ფლანგვის დეტექტორი შესყიდვების მონიტორინგის და სწავლების ცენტრის ანგარიშზე დაყრდნობით წერს, რომ 2015 წლის მდგომარეობით, საქართველოში უტენდერო სახელმწიფო შესყიდვების მაჩვენებელი 34 პროცენტია, რაც მათივე ინფორმაციით, ევროკავშირის საშუალო მაჩვენებელს ექვსჯერ აღემატება.

ფლანგვის დეტექტორი წერს, რომ ანგარიშის თანახმად, ბოლო წლებში მუდმივად იზრდება გამარტივებული შესყიდვების წილი.

2014 წელს, გამარტივებული შესყიდვების წილი მთლიან შესყიდვებთან 32 პროცენტს (915 მილიონი) შეადგენდა, 2015 წელს - 34 პროცენტს (1,1 მილარდი) ხოლო, 2016 წელს სარეკორდოდ მაღალ, 37 პროცენტს (1,5 მილიარდი).

კანონმდებლობის მიხედვით, სახელმწიფოს უტენდეროდ შესყიდვა ფორსმაჟორის პერიოდში ან რაიმე გადაუდებელი აუცილებლობის საფუძველზე შეუძლია. სხვა შემთხვევაში კი კომპანია, რომელთანაც კონტრაქტი ფორმდება, საჯაროდ გამოცხადებული ტენდერის საფუძველზე უნდა იყოს შერჩეული.

2015 წლის მდგომარეობით, ევროკავშირში უტენდერო სახელმწიფო შესყიდვების ყველაზე მაღალი მაჩვენებელი კვიპროსში დაფიქსირდა - 24 პროცენტი, ხოლო ყველაზე დაბალი დიდ ბრიტანეთში, ლუქსემბურგში, მალტასა და პორტუგალიაში - 0 პროცენტი.