ამერიკის შეერთებული შტატები პარიზის კლიმატის ცვლილების შეთანხმებას ტოვებს. ამის შესახებ დღეს, პირველ ივნისს, პრეზიდენტმა დონალდ ტრამპმა განაცხადა.

ტრამპის აზრით, შეთანხმება არასამართლიანია აშშ-სთან და მისი გადასახადების გადამხდელებთან მიმართებით:

"გავდივართ, მაგრამ შევეცდებით მოვილაპარაკოთ და მივაღწიოთ სამართლიან შეთანხმებას. თუ შევძელით ძალიან კარგი იქნება, თუ ვერ - არაუშავს."

პარიზის შეთანხმება ითვალისწინებს გლობალური ტემპერატურის შენარჩუნებას პრე-ინდუსტრიულ მაჩვენებელზე არაუმეტეს 2 გრადუს ცელსიუსისა. მეცნიერების აზრით, ამ ნიშნულის ზრდა პლანეტის ეკოსისტემის განადგურებას გამოიწვევს. შეთანხმების ფარგლებში, ყოველი მონაწილე ქვეყანა შეიმუშავებს გეგმას, რომლითაც შეამცირებს ზიანს გარემოზე.

მხოლოდ ორი ქვეყანა არ იყო პარიზის შეთანხმების მონაწილე: სირია და ნიკარაგუა. სირიის შემთხვევაში ამის მიზეზი სამოქალაქო ომი გახდა, ნიკარაგუას ხელისუფლებამ კი მიიჩნია, რომ შეთანხმება რეალურად ვერ შეეწინააღმდეგებოდა კლიმატის ცვლილებას. ჩრდილოეთ კორეამაც კი მოახდინა პარიზის შეთანხმების რატიფიცირება.

აშშ-მა დადო პირობა, რომ 2025 წლისთვის, შეამცირებდა სასათბურე გაზის ნარჩენებს და დაიყვანდა მას 2005 წლის მაჩვენებლამდე. ასევე, ობამას ადმინისტრაციამ გამოყო 3 მილიარდი აშშ დოლარი გარემოსთვის მიყენებული ზიანის შემცირებაში სხვა ქვეყნების დასახმარებლად.