უკრაინამ რუსეთის ფედერაციის 4 რეგიონში — ოლენიას, ბელაიას, დიაგილევოს და ივანოვოს აეროდრომებზე მასშტაბური თავდასხმა განახორციელა, რის შემდეგადაც ათობით თვითმფრინავს ცეცხლი გაუჩნდა. უკრაინული მედიის ცნობით, უკვე 40-ზე მეტი ბომბდამშენი იქნა განადგურებული. ზარალმა შესაძლოა 2 მილიარდ დოლარს გადააჭარბოს.

უკრაინული მედია წყაროებზე დაყრდნობით იუწყება, რომ უკრაინის უსაფრთხოების სამსახურმა (SBU) კვირას, 1 ივნისს, რუსული სამხედრო თვითმფრინავების განადგურების მასშტაბურ ოპერაცია ჩაატარა.

DW-ის ცნობით, ოპერაციის დროს, რომელსაც კოდური სახელწოდება "ობობას ქსელი" ჰქონდა, 40-ზე მეტი რუსული ბომბდამშენი იქნა განადგურებული, მათ შორის A-50, Tu-95 და Tu-22 M3, ზარალი 2 მილიარდ დოლარზე მეტადაა შეფასებული.

რუსული Telegram არხები წერენ, რომ "ქალაქზე უპილოტო საფრენი აპარატების თავდასხმა მოხდა, რომლებიც ადგილობრივი ბენზინგასამართ სადგურზე გაჩერებული სატვირთო მანქანიდან გამოფრინდნენ", — წერს ტელეგრამ-არხი Baza.

რუსული ტელეგრამ-არხ "რიბარის" ცნობით, "თავდასხმა FPV დრონებით განხორციელდა, რომლებიც ობიექტებზე მისული სატვირთო მანქანებიდან იქნა გაშვებულ. კონტროლი განხორციელდა იქ დამონტაჟებული თანამგზავრული კომუნიკაციების მეშვეობით. "სტრატეგიული საავიაციო თვითმფრინავები Ту-95 და Ту-22 დიდი ხანია აღარ იწარმოება და მათი აღდგენა ვერ მოხდება", — ნათქვამია შეტყობინებაში.

უკრაინული მედია Pravda.ua წერს, რომ ოპერაციას პრეზიდენტი ვოლოდიმირ ზელენსკი აკონტროლებდა, ხოლო გეგმას SBU-ს ხელმძღვანელი, ვასილ მალიუკი ახორციელებდა და ოპერაცია ლოგისტიკური თვალსაზრისით უაღრესად რთული იყო.

"SBU-მ რუსეთში ჯერ FPV დრონები გაგზავნა, შემდეგ კი მობილური ხის სახლები. რუსეთის ფედერაციის ტერიტორიაზე, დრონები სატვირთო მანქანებზე დამაგრებულ პატარა "სახლებში" იყო დამალული. საჭირო დროს, ეს პატარა "სახლების" სახურავები დისტანციურად გაიხსნა და დრონები რუსული ბომბდამშენების დასაბომბად გაფრინდა", — ამბობს Pravda.ua-ს წყარო.

უკრაინული გამოცემა იმასაც წერს, რომ "ამ ისტორიულ სპეცოპერაციაში მონაწილე ადამიანები დიდი ხანია უკრაინაში იმყოფებიან"

უკრაინის უსაფრთხოების სამსახურის ბოლო ცნობით, "მტრის სტრატეგიული ავიაციის სავარაუდო ზარალი 7 მილიარდი აშშ დოლარია. მათივე ინფორმაციით, რუსეთის მთავარ აეროდრომებზე განლაგებული სტრატეგიული ფრთოსანი სარაკეტო მატარებლების 34% განადგურდა.

BBC-ის ინფორმაციით, რუსეთი ადასტურებს, რომ უკრაინამ აეროდრომებზე დრონებით თავდასხმები განახორციელა

Telegram-ზე რუსეთის თავდაცვის სამინისტრო წერს, რომ უკრაინამ რუსეთის 4 რეგიონში "ტერორისტული თავდასხმა" განახორციელა, მაგრამ ყველა თავდასხმა "მოიგერიეს".

"აეროდრომების უშუალო სიახლოვეს მდებარე ტერიტორიიდან FPV დრონების გაშვების შედეგად, საავიაციო აღჭურვილობის რამდენიმე ნაწილს ცეცხლი გაუჩნდა", — ნათქვამია მათ მიერ გავრცელებულ ინფორმაციაში.