ამის შესახებ მან ფორმულას ეთერში ისაუბრა.

რატომ არის მნიშვნელოვანი: 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარემ, ნიკა მელიამ თქვა, რომ კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

ხაბეიშვილის თქმით, როდესაც ენმ-დან პარლამენტის 10 და საკრებულოს ასობით წევრი ფიქრობს, რომ პარტიაში ცვლილებებია საჭირო, მელიამ არა თუ არჩევნებში მონაწილეობის, არამედ ცვლილებების მხარდაჭერის გადაწყვეტილება უნდა მიიღოს.

  • ასევე, აღნიშნა, რომ ენმ-ში ყველაფერი გააკეთეს, რომ ნიკა მელიას დიდი მხარდაჭერა ჰქონოდა. ასევე, იყო პერიოდი, როდესაც ის ძალიან აქტიური იყო და "ძალიან სწორადაც მუშაობდა".
  • "ლიდერი უნდა იყოს გამაერთიანებელი, მე ასე მესმის, მართლა. როცა ლიდერი ვერ აერთიანებს, როცა პარტიის თავმჯდომარეს ამდენი პრობლემა აქვს, მე მგონია, რომ ის სხვას უნდა დაუდგეს გვერდით. ამაში პრობლემაა რამე?"
  • როგორც გუშინ, 11 ნოემბერს ხაბეიშვილმა თქვა, არ ჰგონია, რომ ნიკა მელია გაიმარჯვებს.

დეტალები: ხატია დეკანოიძე, ლევან ხაბეიშვილი და პეტრე ცისკარიშვილი არჩევნებში მონაწილეობას არ აპირებენ.