ამის შესახებ მუმლაძე სოციალურ ქსელში წერს.

რატომ არის მნიშვნელოვანი: 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარის, ნიკა მელიას შეფასებით, კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

მუმლაძე წერს, რომ მისი მიზანი "არსებული უუნარო თავმჯდომარის, ნიკა მელიას და პარტიის უმოქმედო მენეჯმენტის" პარტიის მართვიდან სრულად ჩამოცილებაა.

  • როგორც ის ამბობს, ცვლილებების შემდეგ პარტიის უზარმაზარი ადამიანური და მატერიალური რესურსი უნდა მიემართოს რუსი ოლიგარქის "იძულების კამპანიისკენ", რითაც სააკაშვილი პოლიტიკური ტყვეობიდან გათავისუფლდება.
  • "მოვითხოვ, ჩემი წარმომადგენლები ჩართულნი იყვნენ თავმჯდომარის არჩევნების ფორმატის შემუშავებაში, რომ პროცესი იყოს სანდო, გამჭვირვალე და უზრუნველყოფდეს სამართლიან კონკურენციას!"

დეტალები: მუმლაძის განცხადებით, პარტიაში ჩატარდება არა კოსმეტიკური, არამედ ძირეული ცვლილებები და დამკვიდრდება შიდაპარტიული დემოკრატიის მაღალი სტანდარტი.

  • ასევე, წერს, რომ გადაწყვეტილებების მიღების პროცესი არა კულუარული, არამედ მონაწილეობითი იქნება.
  • "ვიწვევ ნიკა მელიას ნებისმიერ საჯარო ფორმატის დებატებში და მზად ვარ, არგუმენტირებულად ავუხსნა ენმ-ის მხარდამჭერებს, რატომ აღარ უნდა იყოს ის თავმჯდომარე".
  • "მივმართავ ნაციონალური მოძრაობას, დროულად მოიწვიოს პოლიტსაბჭო და უზრუნველყოს სანდო საარჩევნო პროცესი!".

მანამდე, ხატია დეკანოიძემ, ლევან ხაბეიშვილმა და პეტრე ცისკარიშვილმა განაცხადეს, რომ არ არჩევნებში მონაწილეობას არ აპირებენ, ხოლო გიორგი ჩალაძემ თქვა, რომ საკუთარ კანდიდატურას დააყენებს.

არქივიდან: 26 სექტემბერს ნაციონალურმა მოძრაობამ გიორგი მუმლაძე პროვოკაციების მოწყობის მცდელობაში დაადანაშაულა.

  • პარტიაში ამბობდნენ, რომ ოპოზიციაში ჩანერგილ ჯაშუშებთან დაკავშირებით TV პირველის სიუჟეტში ერთ-ერთი პირის ხმა საპროტესტო აქტივობებში ჩართულ აქტიურ ადამიანს მიამსგავსეს;
  • აღნიშნავდნენ, რომ პარტიის გენერალურმა მდივანმა და იმ ადამიანმა, ვის მიმართაც კითხვები არსებობდა, ისაუბრეს, რის შემდეგაც საკითხი ამოიწურა და კითხვის ნიშნები მოიხსნა.
  • მოგვიანებით კი ოთახში, სადაც ნიკა მელია "ჯგუფის რამდენიმე წარმომადგენელს ხვდებოდა", მუმლაძე თანმხლებ პირებთან ერთად შეიჭრა.