გადაწყვეტილება ქუთაისის სააპელაციო სასამართლომ დღეს, 2 ნოემბერს მიიღო.

რატომ არის მნიშვნელოვანი: კაპანაძე საზოგადოებრივი მაუწყებლის აჭარის ტელევიზიის მრჩეველთა საბჭოს 2019 წლის 19 აპრილის გადაწყვეტილებას ასაჩივრებდა, რომლითაც მას იმპიჩმენტი გამოუცხადეს.

  • იმპიჩმენტის ინიციატივას არასამთავრობო ორგანიზაციები მკვეთრად უარყოფითად აფასებდნენ და ტელევიზიაზე სახელისუფლებო გავლენის მოპოვების მცდელობაზე საუბრობდნენ.
  • კაპანაძეს მხარი დაუჭირა საქართველოს სახალხო დამცველმა — პროცესებს გამოეხმაურა აშშ-ის საელჩოც.
  • ნათია კაპანაძის დირექტორობის დროს არხი პირველად მოხვდა საერთაშორისო და ადგილობრივი ორგანიზაციების ანგარიშებში, როგორც ყველაზე დაბალანსებული ტელევიზია.

დეტალები: როგორც კაპანაძე On.ge-სთან ამბობს, ქუთაისის სასამართლომ, ისევე, როგორც ბათუმის საქალაქომ, პოლიტიკური დაკვეთა შეასრულა და მას არცერთი მტკიცებულა შინაარსობრივად არ შეუსწავლია.

  • "ეს გადაწყვეტილება არის თანხვედრაში ქართული ოცნების დამოკიდებულებასთან, მედიამენეჯერებისა და დამოუკიდებელი მედიასაშუალებების წინააღმდეგ არსებული პოლიტიკის", — ამბობს კაპანაძე.
  • მისივე განცხადებით, ასეთი შედეგი აბსოლუტურად მოსალოდნელი იყო, თუმცა საქმე ყველა ინსტანციაში გაივლის.
  • "ცხადია, გამოვიყენებ საერთაშორისო ინსტრუმენტებსაც, იმისთვის, რომ დავამტკიცო როგორი რთული და პოლიტიკური ანგარიშსწორებით არის სავსე საზოგადოებრივი მაუწყებლის გულშემატკივრობა და მხარდაჭერა ჩვენს ქვეყანაში".

არქივიდან: კაპანაძის დირექტორის თანამდებობიდან გადაყენებას ხუთი მრჩევლიდან ოთხმა დაუჭირა მხარი.

  • იმპიჩმენტის პროცესი ნაციონალური მოძრაობის კვოტით წარდგენილმა, ირაკლი დარცმელიძემ და ქართული ოცნების დასახელებულმა, გიგა ჩხარტიშვილმა დაიწყეს.
  • ისინი აცხადებდნენ, რომ დირექტორი მოვალეობას ვერ ასრულებდა, რაც პრიორიტეტების შეუსრულებლობასა და ტელევიზიაში ხელფასებთან დაკავშირებით არსებულ პრობლემებში გამოიხატებოდა.
  • იმპიჩმენტის მოთხოვნაზე ინფორმაციის გავრცელების შემდეგ კაპანაძემ თქვა, რომ საფრთხე ექმნება სარედაქციო დამოუკიდებლობასა და მაუწყებლის გამართულ მუშაობას, ამავეს ამბობდა არხის თანამშრომლების ნაწილიც.
  • 6 მაისს ბათუმის საქალაქო სასამართლომ იმპიჩმენტზე მისი სარჩელი არ დააკმაყოფილა — რაზეც კაპანაძემ განაცხადა, რომ მოსამართლემ პოლიტიკურ დღის წესრიგს არ გადაუხვია.

ნათია კაპანაძე აჭარის ტელევიზიის დირექტორად 2016 წლის 24 ოქტომბერს სამწლიანი ვადით აირჩიეს. უფლებამოსილების შესრულებას ის ამავე წლის 21 დეკემბრიდან შეუდგა.

  • მისი დირექტორობის პერიოდში ეთერში რამდენიმე სხვადასხვა გადაცემა გავიდა. მათ შორის, რადიო თავისუფლების პროექტები, რომელთა გაშვებაზეც საზოგადოებრივი მაუწყებლის პირველმა არხმა უარი განაცხადა.
  • 2019 წელს ეუთოს დემოკრატიული ინსტიტუტებისა და ადამიანის უფლებების ოფისმა (OSCE/ODIHR) ანგარიშში განაცხადა, რომ აჭარის ტელევიზია იყო "ერთადერთი ტელესადგური, რომელმაც შესთავაზა მაყურებელს არჩევნებში მონაწილეთა ზოგადი შედარება".
  • 2018 წელს კაპანაძემ დირექტორის რანგში ტოლერანტობის ქომაგის წოდება მიიღო.