ბათუმის საქალაქო სასამართლომ საზოგადოებრივი მაუწყებლის აჭარის ტელევიზიის ყოფილი დირექტორის, ნათია კაპანაძის სარჩელი არ დააკმაყოფილა. გადაწყვეტილება დღეს, 6 მაისს გამოაცხადა მოსამართლე ჯუმბერ ბეჟანიძემ. ინფორმაცია On.ge-ს ბათუმის საქალაქოში დაუდასტურეს.

როგორც კაპანაძე სოციალურ ქსელში წერს, მოსამართლემ ამ გადაწყვეტილებით პოლიტიკურ დღის წესრიგს არ გადაუხვია.

"იმპიჩმენტის პრინციპულ საკითხები დაუსაბუთებელად მიიჩნია, თუმცა ბოლოს პროცესზე თქვა პროგრამული პრიორიტეტები ვერ შესრულდა, დაავიწყდა აღნიშვნა, რომ პრიორიტეტების ვადა კიდევ რამდენიმე თვე იყო", — აღნიშნავს ის.

კაპანაძე ასაჩივრებდა საზოგადოებრივი მაუწყებლის აჭარის ტელევიზიის მრჩეველთა საბჭოს 2019 წლის 19 აპრილის იმ გადაწყვეტილებას, რომლითაც მას იმპიჩმენტი გამოუცხადეს.

ნათია კაპანაძის დირექტორის თანამდებობიდან გადაყენებას ხუთი მრჩევლიდან ოთხმა დაუჭირა მხარი. იმპიჩმენტის პროცესი ნაციონალური მოძრაობის კვოტით წარდგენილმა ირაკლი დარცმელიძემ და ქართული ოცნების დასახელებულმა გიგა ჩხარტიშვილმა დაიწყეს. ისინი აცხადებდნენ, რომ დირექტორი მოვალეობას ვერ ასრულებდა, რაც პრიორიტეტების შეუსრულებლობასა და ტელევიზიაში ხელფასებთან დაკავშირებით არსებულ პრობლემებში გამოიხატებოდა.

იმპიჩმენტის მოთხოვნაზე ინფორმაციის გავრცელების შემდეგ კაპანაძემ თქვა, რომ საფრთხე ექმნება სარედაქციო დამოუკიდებლობასა და მაუწყებლის გამართულ მუშაობას. მისი თქმით, მაუწყებელი პრიორიტეტებს იმ შესაძლებლობების ფარგლებში ასრულებდა, რაც აქვს.

კაპანაძის იმპიჩმენტის ინიციატივა არასამთავრობო ორგანიზაციებმა მკვეთრად უარყოფითად შეაფასეს და განაცხადეს, რომ მოვლენებს თვალს ადევნებენ. დირექტორს მხარი დაუჭირა საქართველოს სახალხო დამცველმა. პროცესებს გამოეხმაურა აშშ-ს საელჩო საქართველოში.

ნათია კაპანაძის დირექტორობის დროს არხი პირველად მოხვდა საერთაშორისო და ადგილობრივი ორგანიზაციების ანგარიშებში, როგორც ყველაზე დაბალანსებული ტელევიზია.

გაიგე მეტი: