რუსეთი ამტკიცებს, რომ 300 000 ადამიანის ნაწილობრივი მობილიზაციის დავალება შესრულებულია.

რატომ არის მნიშვნელოვანი: ვლადიმერ პუტინმა ნაწილობრივი მობილიზაცია 21 სექტემბერს გამოაცხადა.

  • მობილიზაციის პროცესი მნიშვნელოვანი დარღვევებით მიმდინარეობდა, რაც არაერთხელ გაშუქდა მედიაში — გამოუცდელი და გამოცდილი პირები შესაბამისი მომზადების, აღჭურვილობისა და ტექნიკის გარეშე გაუშვეს ფრონტზე.
  • მობილიზაციის გამოცხადებამდე, რუსეთი უარყოფდა და ცდილობდა დაემალა, რომ უკრაინაში ფრონტის ხაზზე პრობლემები ჰქონდა და პერსონალის დიდი დანაკლისი განიცადა.

დეტალები: 28 ოქტომბერს თავდაცვის მინისტრმა, სერგეი შოიგუმ რუსეთის პრეზიდენტს, ვლადიმერ პუტინის ნაწილობრივი მობილიზაციის დასრულების შესახებ აცნობა.

  • როგორც Meduza წერდა, მობილიზაციის დასასრულებლად საჭიროა პუტინის შესაბამისი განკარგულება.
  • დღეს, პირველ ნოემბერს კი კრემლის პრესსპიკერმა, დიმიტრი პესკოვმა თქვა, რომ მობილიზაცია დასრულებულია და პრეზიდენტის განკარგულება საჭირო არ არის.

რიცხვებში: სერგეი შოიგუ 28 ოქტომბერს ამბობდა, რომ მობილიზებული სამხედროებიდან საწვრთნელ ზონებში რჩება 218 000, ხოლო კონფლიქტის ზონაში გაგზავნეს 82 000 სამხედრო, რომელთაგან 41 000 დანაყოფებშია განაწილებული.

  • დღეს, პირველ ნოემბერს კი ცნობილი გახდა, რომ ფრონტის ხაზზე უკვე 87 000 ადამიანი გაგზავნეს.
  • მობილიზებულთა საშუალო ასაკი 35 წელია.