ინფორმაციას BBC და The Guardian ავრცელებს.

დეტალები: როგორც BBC წერს, 17 წლის აბოლფაზლ ადინეზადემ გააცდინა სკოლა და ანტისამთავრობო აქციაზე წავიდა, მაგრამ სახლში აღარ დაბრუნებულა.

  • ოჯახს მეორე დღეს განათლების სამინისტროდან დაურეკეს და უთხრეს, მათი შვილი განყოფილებიდან წაეყვანათ, იქ მისულებს კი აბოლფაზლი დაღუპული დახვდათ.
  • ხელისუფლებას ოფიციალური კომენტარი არ გაუკეთებია, თუმცა BBC-მ მოიპოვა მისი გარდაცვალების მოწმობა და ექიმების განცხადება, სადაც აღნიშნულია, რომ არასრულწლოვანი გარდაიცვალა ღვიძლისა და თირკმელების დაზიანების შედეგად, რომელიც გამოწვეული იყო ახლო მანძილიდან აირაღს, საფანტის სროლით.
  • "რა დანაშაული ჩაიდინა, რომ მუცელში 24 საფანტი ესროლეთ?" — თქვა მამამ შვილის დაკრძალვაზე.

რატომ არის მნიშვნელოვანი: ირანში მასობრივი პროტესტი გრძელდება. გამოსვლები 22 წლის ქალის, მაჰსა ამინის დაღუპვას მოჰყვა.

  • ის ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა — თვითმხილველების თქმით, პოლიციელები მაჰსას ფიზიკურად გაუსწორდნენ, მოგვიანებით კი ქალი გარდაიცვალა.
  • საერთაშორისო მედიებში გავრცელდა არაერთი ინფორმაცია აქციებზე არასრულწოვნების მკვლელობის შესახებ.

აქციებში დიდი როლი აქვთ ქალებსა და სკოლის მოსწავლეებს, რომლებიც იხდიან ჰიჯაბს, ყვირიან ანტისამთავრობო ლოზუნგებს და სკოლაში აიათოლა ალი ხამენეის პორტრეტის წინ საპროტესტო ფოტოებს იღებენ.

  • ხელისუფლებამ ამას უხეში ძალით, დაკავებებით და სკოლებზე რეიდების სერიით უპასუხა — ძალით შევიდნენ საკლასო ოთახებში, ძალადობრივად დააკავეს მოსწავლეები და გამოიყენეს ცრემლსადენი გაზი.
  • ირანის მასწავლებელთა კავშირმა დაგმო "სასტიკი და არაადამიანური" რეიდები და განათლების მინისტრის გადადგომა მოითხოვა.
  • არსებული ინფორმაციით, მათ სასიკვდილოდ სცემეს მოსწავლე გოგო, რომელმაც უარი თქვა, ემღერა რეჟიმის სადიდებელი ჰიმნი.
  • ირანის ადამიანის უფლებათა ჯგუფის ბოლო ანგარიშის თანახმად, 17 ოქტომბრის მდგომარეობით, საპროტესტო აქციების შედეგად დაიღუპა 215 ადამიანი, მათ შორის 27 ბავშვი.