ირანის ელჩმა გაეროში ამირ საეიდ ირავანმა თქვა, რომ დასავლეთის ქვეყნები აწარმოებენ "დეზინფორმაციულ კამპანიას ირანის წინააღმდეგ".

რატომ არის მნიშვნელოვანი: რამდენიმე კვირაა, რაც რუსეთი უკრაინულ დასახლებებს ირანული კამიკაძე დრონებით ბომბავს. ამის დამადასტურებელი არაერთი ფოტო-ვიდეო კადრი გავრცელდა.

  • უკრაინის ომში უპილოტო თვითმფრინავების გამოყენება ზაფხულის შემდეგ გაიზარდა, როდესაც მოსკოვმა შაჰიდ-136 თვითმფრინავი ირანიდან შეიძინა (ამას ადასტურებს უკრაინა და აშშ).
  • უკრაინის შეიარაღებული ძალების საჰაერო სარდლობა აცხადებს, რომ 36 დღეში 223 ე.წ. კამიკაძე დრონი გაანადგურეს.

დეტალები: ამირ საეიდ ირავანმა თქვა, რომ თეირანი არ დაარღვევს უშიშროების საბჭოს რეზოლუციას რუსეთში თვითმფრინავების გაგზავნით.

  • ირანული დრონების გამოყენებას უარყოფს რუსეთიც. გაეროში რუსეთის მუდმივი წარმომადგენლის პირველმა მოადგილემ, უშიშროების საბჭოს სხდომის შემდეგ გამართულ პრესკონფერენციაზე ჟურნალისტებს განუცხადა, რომ უკრაინის წინააღმდეგ გამოყენებული ყველა უპილოტო თვითმფრინავი რუსულია და არა ირანული.

უკრაინა: საგარეო საქმეთა მინისტრმა, დმიტრო კულებმ ზელენსკის ირანთან დიპლომატიური ურთიერთობის გაწყვეტა შესთავაზა.

  • "მე არ ვენდობი ირანის ხელმძღვანელობას", — თქვა ზელენსკიმ.

აშშ: სახელმწიფო დეპარტამენტის განცხადებით, აშშ ეთანხმება საფრანგეთისა და დიდი ბრიტანეთის შეფასებას, რომ დრონები გაეროს უშიშროების საბჭოს რეზოლუციას არღვევს.

  • აშშ-ის სახელმწიფო დეპარტამენტის სპიკერმა, ნედ პრაისმა 19 ოქტომბერს განაცხადა, რომ აშშ-ს აქვს მტკიცებულება, რომ რუსეთი იყენებს ირანულ თვითმფრინავებს უკრაინაზე თავდასხმისთვის.
  • აშშ ასევე გამოთქვამს მზადყოფნას, ირანს რუსეთისთვის უპილოტო საფრენი აპარატების მიწოდების გამო სანქციები დაუწესოს.

ევროკავშირი: Reuters-ის ცნობით, ევროკავშირის წევრი ქვეყნების მთავრობები უკრაინაში რუსეთის მიერ ირანული დრონების გამოყენების გამო ირანელ გენერლებსა და კომპანიებზე ახალი სანქციების დაწესებაზე შეთანხმდებიან.