ამის შესახებ შესაბამისი განცხადებები ამერიკის შეერთებული შტატების ოფიციალურმა პირებმა გააკეთეს.

რატომ არის მნიშვნელოვანი: უკვე რამდენიმე კვირაა რუსეთი უკრაინულ დასახლებებს ირანული კამიკაძე დრონებით ბომბავს.

  • მხოლოდ გუშინ კიევზე საჰაერო თავდასხმას, ბოლო მონაცემებით, 5 ადამიანი ემსხვერპლა — მათ შორის, 6 თვის ორსული და მისი ქმარი.
  • ირანი რუსეთისთვის დრონების მიწოდების ფაქტს უარყოფს.

დეტალები: სახელმწიფო დეპარტამენტის განცხადებით, აშშ ეთანხმება საფრანგეთისა და დიდი ბრიტანეთის შეფასებას, რომ დრონები გაეროს უშიშროების საბჭოს რეზოლუციას არღვევს.

  • "გვჯერა, რომ ეს უპილოტო საფრენი აპარატები, რომელიც ირანიდან რუსეთში გადაიტანეს და რუსეთმა უკრაინაში გამოიყენა, არის იმ იარაღებს შორის, რომელიც ემბარგოს ფარგლებში დარჩება.

თეთრი სახლის პრესსპიკერის, კარინ ჟან-პიერის თქმით, რუსეთმა ირანისგან დრონები ნამდვილად მიიღო, რუსი ოპერატორები კი ამ სისტემის გამოყენებას სწავლობენ.

  • მისივე თქმით, არსებობს არაერთი მტკიცებულება, რომ რუსეთმა ისინი სამხედრო და სამოქალაქო ობიექტების წინააღმდეგ გამოიყენა.
  • სპიკერი ამბობს იმასაც, რომ ირანი უფრო მეტი დესტრუქციული იარაღის გაყიდვასაც კი განიხილავს.

სანქციები: პიერის განცხადებით, აშშ სანქციების აღსრულების ერთგული რჩება და განაგრძობს ამ ნაბიჯების გადადგას, როგორც რუსეთის, ასევე, ირანული იარაღით ვაჭრობის წინააღმდეგ.

  • "ეს არის ის, რასაც ჩვენ გავაკეთებთ, გავურთულებთ ირანს რუსეთისთვის ამ იარაღის მიყიდვას".
  • ირანს სანქციები ემუქრება ევროკავშირისგანაც. ამის შესახებ განცხადება საგარეო პოლიტიკისა და უსაფრთხოების საკითხებში EU-ს უმაღლესმა წარმომადგენელმა, ჯოზეფ ბორელმა გააკეთა.

რას გულისხმობს რეზოლუცია: ის დაკავშირებულია შეთანხმებასთან, რომელიც კრძალავს ირანის მიერ სხვა ქვეყნებისთვის სამხედრო ტექნიკის გადაცემას.

  • შეთანხმება ირანის, დიდი ბრიტანეთის, ჩინეთის, საფრანგეთის, გერმანიის, რუსეთისა და ამერიკის შეერთებული შტატების მიერაა ხელმოწერილი.
  • რეზოლუციის თანახმად, ირანულ იარაღზე ემბარგო 2020 წლის ოქტომბრამდე მოქმედებდა, თუმცა დასავლელი პარტნიორები ამბობენ, რომ ემბარგო რაკეტებსა და სხვა ტიპის სამხედრო ტექნიკაზე 2023 წლის ოქტომბრამდე ვრცელდება.
  • ასევე, ეხება ისეთ მოწინავე სამხედრო სისტემების ექსპორტსა და შეძენას, როგორიც მაგალითად, დრონებია.