ინიციატივა United24-ს, Monobank-სა და მოხალისე იგორ ლაჩენკოს ეკუთვნით. სპეციალური სისტემის შესაძენად ისინი 100 მილიონი გრივნას აგროვებას აპირებენ.

რატომ არის მნიშვნელოვანი: უკვე რამდენიმე კვირაა, რაც რუსეთი უკრაინულ დასახლებებს ირანული კამიკაძე დრონებით ბომბავს.

  • უკრაინის დაზვერვის მონაცემებით, ოკუპანტმა ქვეყანამ ირანიდან 2 400 ასეთი უპილოტო საფრენი აპარატი შეუკვეთა.
  • ეს სისტემა დაეხმარება უკრაინას, დაიცვას მშვიდობიანი მოსახლეობა აგრესორის თავდასხმისას.

დეტალები: უკრაინის ციფრული ტრანსფორმაციის მინისტრის, მიხაილო ფედოროვის ინფორმაციით, ამ ინიციატივის ფარგლებში უკრაინის მცველთა დღეზე გამოუშვეს 1 000 სამაჯური წარწერით: "მე მჯერა უკრაინის შეიარაღებული ძალების".

  • აქედან ას სამაჯურს პირადად მთავარსარდალმა ვალერი ზალუჟნიმ მოაწერა ხელი.
  • სამაჯურები არ იყიდება, მაგრამ შესაძლებელია მისი მოგება საქველმოქმედო ბანკში დონაციით, რომლის საწყისი თანხა 5 გრივნაა.
  • პროექტი გაგრძელდება 14 ოქტომბრის 9:00 საათიდან 15 ოქტომბრის 23:00 საათამდე, კიევის დროით.

არქივიდან: პლატფორმა United24 ვოლოდიმირ ზელენსკის ინიციატივით შეიქმნა, მისი პირველი ელჩი ლეგენდარული ფეხბურთელი ანდრეი შევჩენკო იყო.

  • რაც შეეხება ირანულ დრონებს, მათი შესყიდვის შესახებ ჯერ კიდევ აგვისტოში გახდა ცნობილი, თუმცა ირანი უარყოფდა.
  • სექტემბრის შუა რიცხვებში ხარკოვის ოლქში პირველად ჩამოაგდეს ირანული დრონი.
  • რუსეთმა ირანული დრონები გამოიყენა 10-11 ოქტომბერსაც, როცა მასიურად დაბომბა უკრაინის ქალაქები.
  • ეროვნული უსაფრთხოებისა და თავდაცვის საბჭოს მონაცემებით, ოქტომბრის დასაწყისისთვის უკრაინის შეიარაღებულმა ძალებმა ჩამოაგდეს რუსეთის გამოშვებული ირანული კამიკაძე თვითმფრინავების მინიმუმ 85%.