ქვეყნის მასშტაბით უშუქოდ მყოფი მოქალაქეების დახმარებას და ინფორმირებას სხვადასხვა გზით ცდილობენ — აქტიურ როლს თამაშობს უკრაინული მედიაც.

რატომ არის მნიშვნელოვანი: დღეს, 10 ოქტომბერს რუსების მასიურმა სარაკეტო შეტევამ მნიშვნელოვნად დააზიანა კრიტიკული ინფრასტრუქტურის ობიექტები.

  • დაბომბილი ქალაქებისა და რეგიონების ნაწილი ელექტროენერგიის გარეშე დარჩა.

რა ხდება: დღის განმავლობაში ოფიციალური პირები ამბობდნენ, რომ ეტაპობრივად მოუწევდათ შუქის გათიშვა, რესურსების დასაზოგად, ელექტრო ქსელების კრიტიკული გადატვირთვების ასარიდებლად და დაზიანებული ქსელების შესაკეთებლად

  • გარდა ამისა, უკრაინელებს მოუწოდებენ, რომ საღამოს 5-დან 10 საათამდე მაქსიმალურად შეზღუდონ ელექტროენერგიის მოხმარება — ეს შეამცირებს გამორთვის საჭიროებას.
  • დედაქალაქში 4 რეგიონში შუქის ე.წ. მოძრავი გათიშვა დაიწყო.
  • ხოლო კიევის ოლქში ზოგიერთი სამრეწველო საწარმოსა და საყოფაცხოვრებო მომხმარებლისთვის ელექტროენერგიას დაახლოებით 2 საათით გათიშავენ.
  • ლვოვის ოლქში 90%-ს შუქი არ აქვს, ტროლეიბუსები და ტრამვაი გაჩერებულია — მიწოდების აღდგენას, შესაძლოა, 24 საათზე მეტი დასჭირდეს.
  • ქალაქ ხარკოვს და ოლქში ელექტროენერგიის მიწოდება 40-50%-ით აღდგა.

ენერგეტიკის სამინისტრო აცხადებს, რომ საკუთარი ენერგეტიკული სისტემის სტაბილიზაციის მიზნით ელექტროენერგიის ექსპორტს წყვეტენ.

  • "უკრაინიდან ელექტროენერგიის ექსპორტი დაეხმარა ევროპას რუსული ენერგორესურსების მოხმარების შემცირებაში. სწორედ ამიტომ ანადგურებს რუსეთი ჩვენს ენერგეტიკულ სისტემას, კლავს უკრაინიდან ელექტროენერგიის ექსპორტის შესაძლებლობას", — განაცხადა მინისტრმა.
  • უწყება განმარტავს, რომ ზაპოროჟიეს ატომური ელექტროსადგურის გაჩერების შემდეგაც, რომელიც 7 თვეზე მეტი ხნის განმავლობაში იმყოფებოდა რუსეთის ოკუპაციის ქვეშ, უკრაინამ შეასრულა თავისი ვალდებულებები ევროპელი პარტნიორების წინაშე ელექტროენერგიის ექსპორტში.
  • თუმცა, დღეს ენერგეტიკულ ობიექტებზე თავდასხმებმა დააზიანა თბოწარმოება და ელექტრო ქვესადგურები, რაც უკრაინას აიძულებს, ეს გადაწყვეტილება მიიღოს.