წინანდალში გამართულ თიბისის 30 წლის იუბილეზე, ტურიზმის განვითარებაში შეტანილი განსაკუთრებული წვლილისთვის, გაეროს მსოფლიო ტურიზმის ორგანიზაციის გენერალურმა მდივანმა, ზურაბ პოლოლიკაშვილმა თიბისის გენერალურ დირექტორს, ვახტანგ ბუცხრიკიძეს სპეციალური ჯილდო გადასცა.

აღნიშნული ჯილდო ვახტანგ ბუცხრიკიძეს საქართველოში ტურიზმის განვითარებისა და აღდგენისადმი განსაკუთრებული მხარდაჭერისა და ერთგულებისთვის გადაეცა.

გაეროს მსოფლიო ტურიზმის ორგანიზაციის ჯილდო სხვადასხვა დროს მსოფლიოში არაერთ ცნობილ ადამიანს გადაეცა, მათ შორის სახელმწიფოს მეთაურებს, აშშ-ს 44-ე პრეზიდენტ ბარაკ ობამას, გერმანიის კანცლერ ანგელა მერკელს, ესპანეთის, იტალიის, პორტუგალიის, ბულგარეთის, იაპონიის, კატარის, ალჟირის, ეგვიპტის, ბრაზილიისა და სხვა ქვეყნების პრემიერ-მინისტრებსა და პრეზიდენტებს, ესპანეთის მეფე ფილიპე მეექვსეს, რომის პაპ ფრანცისკეს, ცნობილ ფეხბურთელ ლიონელ მესის, ცნობილ დიზაინერებს: ჯორჯო არმანის, სტეფანო რიჩის და სხვებს.

2003 წლიდან დღემდე, გაეროს მსოფლიო ტურიზმის ორგანიზაცია აფასებს და აღიარებს იმ ორგანიზაციებისა და ინდივიდების მუშაობას მთელს მსოფლიოში, რომლებიც ინოვაციებისა და ცოდნის მეშვეობით დადებით გავლენას ახდენენ ტურიზმის სექტორის განვითარებაზე.