ადამიანის უფლებათა ცენტრის იურიდიულ საკითხთა დეპარტამენტის ხელმძღვანელის, თამარ ავალიანის, თქმით, ლაშა თორდიასა და ოთარ ფარცხალაძის დაპირისპირების საქმეში დღეიდან ადამიანის უფლებათა ცენტრი ჩაერთო და ის ლაშა თორდიას სამართლებრივ უფლებებს დაიცავს.

ავალიანი აცხადებს, რომ ის ლაშა თორდიას ერთ-ერთი ადვოკატი იქნება. იგი შეშფოთებას გამოთქვამს ფაქტის გამო და პარლამენტისგან რეაგირებას ითხოვს:

"შეშფოთებული ვართ, რომ პირს, რომელსაც მაღალი კონსტიტუციური სტატუსი აქვს, მას თავს ესხმიან, მის სამსახურებრივ მოვალეობასთან დაკავშირებით, და ეს თავდასხმა მის საქმიანობასთან პირდაპირ კავშირში იყო, სავარაუდოდ, ყოფილი პროკურორის ოთარ ფარცხალაძისა და მისი თანხმლები პირების მხრიდან.

პარლამენტს მკაფიოდ და ნათლად არ გამოუხატავს მისი დამოკიდებულება ამ საქმესთან დაკავშირებით და არ დაინტერესბულა მისით".

ავალიანი აცხადებს, რომ საქმის გამოძიება თავიდანვე არასწორი მუხლით დაიწყო, რაც კიდევ ერთხელ აფიქსირებდა საგამოძიებო უწყებების სუბიექტურ ინტერესს, არ გამოძიებულიყო აღნიშნული საქმე:

"აქ 126 მუხლი, რომელიც მხოლოდ ცემას გულისხმობს, და კავშირი არ აქვს სამსახურეობრივი მოვალეობის შესრულებასთან, არ არის რელევანტური ლაშა თორდიას ამ ინციდენტთან დაკავშირებით, გამოძიება უნდა დაწყებულიყო სსკ-ის 353-ე პრიმა მუხლით, რომელიც გულისხმობს თავდასხმას სახელმწიფო ხელისუფლების წარმომადგენელზე, მის სამსახურეობრივ მოვალეობასთან დაკავშირებით, რადგან თორდიაზე თავდასხმა მოჰყვა იმ საქმიანობას, რასაც აუდიტის სამსახური ახორციელებს, კერძოდ კორუფციულ გარიგებებთან დაკავშირებით, რომელშიც სავარაუდოდ ფიგურირებს ყოფილი პროკურორი ოთარ ფარცხალაძე".

თამარ ავალიანი მიიჩნევს, რომ სახელმწიფოს საქმის დაწყებისთანავე არ სურდა მისი ობიექტური გამოძიება. ის აბურდულს უწოდებს ფარცხალაძის ადვოკატის განცხადებას, იმის თაობაზე, რომ ყოფილი პროკურორის დაცვის წევრებმა "პროპორციული ძალა"გამოიყენეს, და დასძენს, რომ ლაშა თორდიამ ინციდენტისას სერიოზული დაზიანებები მიიღო სახის არეში, მათ შორის თავის ქალის დახურული ტრავმა.

ავალიანი აცხადებს, რომ საქმეში ფიგურირებს კიდევ ერთი პირი, რომლითაც გამოძიება არ ინტერესდება. მისი თქმით, ესაა საფინანსო პოლიციის მაღალჩინოსანი მიშა ჩოხელი.