ამის შესახებ ევროპული საბჭოს წევრებმა ოფიციალური განცხადება გაავრცელეს და აღნიშნეს, რომ ამ უკანონო გადაწყვეტილებას არასდროს არ აღიარებენ.

რატომ არის მნიშვნელოვანი: დღეს ვლადიმერ პუტინმა უკრაინის ოკუპირებული რეგიონების ანექსია გააფორმა.

  • პუტინმა იკადრა და ამ ცერემონიიდანაც მოუწოდა უკრაინას დაუყოვნებლივ შეწყვიტოს ცეცხლი და დაბრუნდეს მოლაპარაკების მაგიდასთან;
  • თუმცა მისი თქმით, დონეცკის, ლუგანსკის, ხერსონის და ზაპოროჟიეს ხალხის არჩევანი უკვე გაკეთებულია და "რუსეთი მას არ უღალატებს".

დეტალები: მათი თქმით, წესებზე დამყარებული საერთაშორისო წესრიგის განზრახ ძირის გამოთხრით და უკრაინის დამოუკიდებლობის, სუვერენიტეტისა და ტერიტორიული მთლიანობის ფუნდამენტური უფლების აშკარად დარღვევით, რუსეთი გლობალურ უსაფრთხოებას რისკის ქვეშ აყენებს.

  • "ჩვენ არ ვაღიარებთ და არასდროს ვაღიარებთ უკანონო "რეფერენდუმებს" და მათ გაყალბებულ შედეგებს. არასდროს ვაღიარებთ ამ უკანონო ანექსიას. ეს გადაწყვეტილებები ღირებულების არმქონე და ცარიელია და იურიდიული ეფექტის მოხდენა არ შეუძლიათ";
  • "ყირიმი, ხერსონი, ზაპოროჟიე, დონეცკი და ლუგანსკი უკრაინაა. მოვუწოდებთ ყველა სახელმწიფოსა და საერთაშორისო ორგანიზაციებს ერთმნიშვნელოვნად უარყონ ეს უკანონო ანექსია".

საბჭოს თქმით, რუსეთის წინააღმდეგ შემაკავებელ ზომებს გააძლიერებენ, ხოლო უკრაინის ეკონომიკურ, სამხედრო, სოციალურ და ფინანსურ მხარდაჭერას გააგრძელებენ.

  • მათი განცხადებით, კრემლის მიერ ატომური მუქარა, სამხედრო მობილიზაცია და სტრატეგია, რომ უკრაინის ტერიტორია მოტყუებით რუსეთის ტერიტორიად წარმოაჩინონ, რათა შექმნან წარმოდგენა, რომ ომი ახლა, შესაძლოა, რუსეთის ტერიტორიაზე მიმდინარეობდეს, მათ გადაწყვეტილებას ვერ შეარყევს.