დავით კეზერაშვილის განცხადებას ფორმულა ავრცელებს.

რატომ არის მნიშვნელოვანი: რამდენიმე დღის წინ მელიამ თქვა, რომ მიაჩნია, რაც უფრო შორს იქნება კეზერაშვილი პოლიტიკური სპექტრიდან, მით უკეთესი იქნება მისთვის და ქართული პოლიტიკური ცხოვრებისთვის.

რას ამბობს კეზერაშვილი: მისი განცხადებით, უკვე მრავალი წელია სახელისუფლებო მედია მის მიმართ ტყუილსა და ცილისწამებას არ ერიდება, თუმცა გულდასაწყვეტი სიახლე ისაა, რომ ამდაგვარ კამპანიაში ცალკეული ოპოზიციური ლიდერებიც ჩაერთნენ;

  • თავდაცვის ყოფილი მინისტრი ამბობს, რომ მას არასდროს არავისთვის მოუხვევია არც მეგობრობა, არც პარტნიორობა;
  • მისივე თქმით, არასდროს ჩარეულა და არც მომავალში აპირებს ჩაერიოს ცალკეული ოპოზიციური პარტიების დღის წესრიგის განსაზღვრაში და პარტიული პოლიტიკის მიმართ ინტერესი არ აქვს;
  • "მტერმაც და მოყვარემაც მინდა იცოდეს, რომ არ გამაჩნია არანაირი პირადი ან პარტიული დღის წესრიგი ქართულ პოლიტიკაში";

გარდა ამისა, კეზერაშვილის თქმით, არ აპირებს მშვიდად იყოს და შორიდან უყუროს მიხეილ სააკაშვილისა და ნიკა გვარამიას ციხეში ყოფნას, ვინაიდან ისინი რეჟიმის პოლიტიკური პატიმრები არიან და რაც შეუძლია, ყველაფერს გააკეთებს მათი გათავისუფლებისთვის;

  • ფორმულას დამფუძნებელი აცხადებს, რომ გააგრძელებს დამოუკიდებელი მედიის მხარდაჭერას, მიუხედავად მრავალი წინააღმდეგობისა, რომელსაც ხელისუფლება ეწევა ფორმულასა და ზოგადად, კრიტიკული ქართული მედიასაშუალებების წინააღმდეგ;
  • "ცილისწამება და თავდასხმები შედეგს ვერ გამოიღებს — ბრძოლა საქართველოს უკეთესი მომავლისთვის მუდმივი პროცესია და სანამ ამ ბრძოლაში ერთი აგურის დადება შემეძლება, ამას ყოველთვის გავაკეთებ".