ძილი ცხოვრების განუყოფელი ნაწილია, რომლის გარეშეც, როგორც წესი, ნორმალურად ფუნქციონირება შეუძლებელია ხოლმე. მიუხედავად ამისა, რიგი ფაქტორების გამო კარგად გამოძინება ზოგჯერ არც ისე მარტივია.

ასევე იხილეთ: ძილის მეცნიერება — რატომ გვძინავს და რა ხდება ამ დროს ჩვენს ორგანიზმში

სტატიაში ჯერ ძილისთვის საუკეთესო პოზის საკითხს შევეხებით, შემდეგ კი რამდენიმე სხვა რჩევასაც გაგიზიარებთ.

არსებობს თუ არა სწორი პოზა ძილისათვის?

ადამიანთა უმეტესობა გვერდულად მწოლიარე ამჯობინებს ძილს. ეს კარგია, რადგან ზურგზე წოლისას ძილისა და სუნთქვასთან დაკავშირებული პრობლემები უფრო ხშირად იქმნება.

ღამით, როგორც წესი, ბევრს ვმოძრაობთ. 664 მძინარე ადამიანზე ჩატარებულ კვლევაში მონაწილეებს დროის 54% გვერდულად ეძინათ, 37% — ზურგზე, ხოლო 7% კი — მუცელზე.

მამრობითი სქესის ადამიანები, განსაკუთრებით 35 წელს ქვემოთ, ჩვეულებრივ, შედარებით მოუსვენრები არიან — უფრო ხშირად იცვლიან პოზას და ასეთივე ტემპით ამოძრავებენ მკლავებს, ბარძაყებსა თუ ზურგის ზედა ნაწილს.

ძილის დროს თქვენი სხეული ნებისმიერი სახის დისკომფორტს ანდა ტკივილს აკონტროლებს, პოზიციას კი ამის შესაბამისად იცვლით. სწორედ ამიტომ არ გვიჩნდება ნაწოლები ჩვეულებრივ შემთხვევებში, შესაბამისად, უმჯობესია, მოძრაობის კუთხით თავი არ შეუზღუდოთ.

მაშინ, თუკი თავისუფლად მოძრაობისაგან პარტნიორი (ანდა შინაური ცხოველი) გაბრკოლებთ, ადგილების გაცვლაზე ანდა უფრო დიდი საწოლის შეძენაზე დაფიქრდით. საკუთარი თავი არ შებოჭოთ და ორივე მხარეს თავისუფლად მოძრაობის საშუალება მიეცით.

საგულისხმოა, რომ ძილისათვის საუკეთესო პოზის საკითხზე ზუსტ პასუხს არც ერთი ხარისხიანი კვლევა არ გვთავაზობს. მიუხედავად ამისა, სხეულისთვის ისეთი მდგომარეობის შერჩევა მაინც შეგვიძლია, რომელიც კარგად დაძინებაში დაგვეხმარება და ყოველგვარ ტკივილს აგვარიდებს თავიდან.

იმის გასაგებად, თუ რომელი პოზაა თქვენი სხეულისათვის ზედგამოჭრილი, რამდენიმე ფაქტორი უნდა გაითვალისწინოთ: თქვენი ასაკი, მასა, გარემო, აქტივობები და ის, ხართ თუ არა ორსულად.

აღსანიშნავია, რომ ზოგიერთი პოზა მაინც სხვებზე უკეთესია. ერთ-ერთი კვლევის ფარგლებში იმ ადამიანებს, რომელთა წოლაც ხერხემლის ტრიალს (მაგალითად, გვერდზე რაიმე საყრდენის გარეშე წოლა) მოიცავდა, დილით უფრო მეტი ტკივილით ეღვიძებოდათ.

მაშინაც კი, როცა გვერდზე ზოგიერთი ფორმით წოლისას ხერხემლის დატვირთვის შანსი არსებობს, როგორც ჩანს, ზოგადად, გვერდულ პოზაში წოლა მაინც სხვა ვარიანტებზე უკეთესია.

როგორი ბალიში უნდა შევარჩიოთ?

შესაბამისი ბალიშის შერჩევა კარგად გამოძინებისათვის ძალიან მნიშვნელოვანია.

დადგენილია, რომ კისერსა და თავთან საყრდენის ნაკლებობას ხერხემალზე ცუდი გავლენა აქვს. შესაძლოა, ამან კუნთის პრობლემები გამოიწვიოს, მაგალითად, კისრისა თუ მხრების ტკივილი და გაშეშება.

ხერხემლის კუთხით ნაკლებად მნიშვნელოვანია, რისგანაა ბალიში დამზადებული — ამ დროს მხოლოდ მისი სიმაღლე და ფორმა თამაშობს როლს. შესაძლოა, U-ს ფორმის ბალიში ძილის გახანგრძლივებაში დაგეხმაროთ, ცილინდრის ფორმისა კი — ღამით და დილით ტკივილების შემცირებაში, თუკი ქრონიკული ტკივილები გაწუხებთ.

მეცნიერება საუკეთესო მატრასის შესახებ რჩევებს არ გვაძლევს, თუმცა უნდა გაითვალისწინოთ, რომ ცუდი მატრასებიც არსებობს — თუკი იგი ჩაზნექილია, სიმტკიცე დაკარგა ანდა გაცვდა, უმჯობესია, ახლით ჩაანაცვლოთ. აღსანიშნავია, რომ წელიწადში 1-2-ჯერ მატრასის გადმობრუნებით იგი უფრო დიდხანს იქნება გამოსადეგი.

სხვა რჩევები კარგად გამოძინებისთვის

  • გრილ გარემოში დაიძინეთ. ამისათვის იდეალური ტემპერატურა 18.3°C-ია, დაახლოებით 15-19°C. შესაძლოა, უფრო თბილმა გარემომ ძილის ხარისხზე უარყოფითად იმოქმედოს;
  • ოთახის განიავებაზე იზრუნეთ. სუფთა ჰაერი და დაგროვილი სიცხის განეიტრალება დაძინებაში დაგეხმარებათ;
  • საკუთარ რაციონს ყურადღება მიაქციეთ. ზოგიერთი მედიკამენტი, მათ შორის, რამდენიმე ტიპის ანტიჰისტამინი, ჩაძინებას ამარტივებს. მეორე მხრივ, კოფეინის მაგვარ სტიმულანტებს ძილის ხარისხის მნიშვნელოვნად გაუარესება შეუძლია, ამიტომაც უმჯობესია, მათი მიღება გააკონტროლოთ.

დაბოლოს, ნამდვილად არახალი, თუმცა ფრიად მნიშვნელოვანი საკითხი — შარდის ბუშტი დაძინებამდე დაცალეთ, რათა ღამით ამისათვის ადგომა არ მოგიწიოთ.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.