საზოგადოებრივი მაუწყებლის ინფორმაციით, კლინიკა ლანცეტის დირექტორი, ფარმან ჯეირანლი წარდგენილ ბრალს არ აღიარებს. მას პაციენტებისგან დიდი ოდენობით თანხის მოტყუებით დაუფლება ედება ბრალად.

ბრალდებულის ადვოკატის, მიხეილ ოთარაშვილი საზოგადოებრივ მაუწყებელთან აცხადებს, რომ ჯეირანლის ჩვენება ჯერჯერობით არ მიუცია. მისივე თქმით, ლანცეტის დირექტორს თანხა არ მიუთვისებია. ადვოკატი აღკვეთის ღონისძიებასთან დაკავშირებულ სასამართლო სხდომაზე არასაპატიმრო ღონისძიების გამოყენების მოთხოვნასა და 50-დან 100 ათასამდე ლარის გირაოს შესთავაზებას გეგმავს.

კლინიკა ლანცეტში ღვიძლის გადანერგვის შემდეგ გარდაცვლილი კარლო კეკელიძის მეუღლე, ნანა კეკელიძე, კლინიკის ყოფილი მთავარი ექიმის, ნინო კუზანოვას და კლინიკის იურისტის, გიორგი არჩვაძის დასჯას ითხოვს. ნანა კეკელიძემ საზოგადოებრივ მაუწყებელს განუცხადა, რომ კუზანოვა ოპერაციამდე მას და მის მეუღლეს ოპერაციის წარმატებით ჩატარებას დაჰპირდა და არწმუნებდა, რომ ოპერაციას გამოცდილი და ლიცენზირებული ექიმები ჩაატარებდნენ.

ნინო კუზანოვა კლინიკაში ღვიძლის გადანერგვისას ორი პაციენტის გარდაცვალებასთან დაკავშირებით პასუხისმგებლობას არ გრძნობს. მისი თქმით, მან და ჯეირანლიმ ამ საკითხზე იკამათეს, რის გამოც ის "მნიშვნელოვან საკითხებს" ჩამოაშორეს და კლინიკის დატოვება მოუწია.

2016 წელს კლინიკა ლანცეტში ორი ოპერაცია ჩატარდა, რომლის შედეგად გიორგი ჩუბინიძე და კარლო კეკელიძე გარდაიცვალნენ. 2017 წლის 22 მაისს კი, საქართველოს პროკურატურამ პაციენტებისგან დიდი ოდენობით ფულადი თანხის მოტყუებით დაუფლებისა და სიცოცხლისთვის ან ჯანმრთელობისთვის საფრთხის შემქმნელი გარემოების შესახებ ინფორმაციის დამალვის ბრალდებით, კლინიკის დირექტორი დააკავა.