საპარლამენტო ფრაქცია ნაციონალურმა მოძრაობამ პარლამენტში განსახილველად წარადგინა ახალი საკანონმდებლო ინიციატივა, რომელიც გულისხმობს საქართველოს სისხლის სამართლის საპროცესო კოდექსში ცვლილებების შეტანას. ცვლილებები ეხება ნაკლებად მძიმე ეკონომიკური სახის დანაშაულზე წინასწარი პატიმრობის, როგორც დანაშაულის აღკვეთის ღონისძიების გაუქმებას.

საკანონმდებლო ინიციატივა ეხება საქართველოს სისხლის სამართლის კოდექსის ორმოცდაოთხ მუხლს.

კანონპროექტი ითვალისწინებს წინასწარი პატიმრობის გაუქმებას, ისეთ ეკონომიკურ დანაშაულებზე როგორიც არის:

  • სამრეწველო საკუთრების უფლების ხელყოფა;
  • უკანონო სამეწარმეო საქმიანობა:
  • უკანონო საგანმანათლებო საქმიანობა;
  • ცრუ მეწარმეობა;
  • უკანონო შემოსავლის ლეგალიზაცია;
  • ფალსიფიცირებული ნივთის უკანონო გადაზიდვა ან გასაღება;
  • ბუღალტრული აღრიცხვის წესის დარღვევა;
  • უკანონო ქმედება გადახდისუუნარობისას;
  • საქონლის სასაქონლო ზედნადების გარეშე ტრანსპორტირება;
  • კრედიტის უკანონოდ მიღება;
  • ყალბი საკრედიტო ბარათის ან საანგარიშსწორებო ბარათის დამზადება/გასაღება ან გამოყენება;
  • ფასიანი ქაღალდების ბაზრის წესის დარღვევა;
  • ეკომარკით უკანონოდ სარგებლობა;
  • ყალბი აქციზური მარკების დამზადება, გასაღება/გამოყენება;
  • ყალბი რეკლამა;
  • სავალდებულო მარკირებას დაქვემდებარებული არააქციზური საქონლის მარკირების ნიშნის გარეშე გამოშვება, რეალიზაცია და სხვა.

ერთიანი ნაციონალური მოძრაობა ინიციატივას თავის საარჩევნო პროგრამის მიხედვით წარადგენს.

ენმ აცხადებს, რომ კანონპროექტის შემუშავებისას პარტიამ გაითვალისწინა საუკეთესო საერთაშორისო პრაქტიკა ისეთი ქვეყნების მაგალითებზე, როგორიცაა გერმანია, დანია, ნორვეგია, საფრანგეთი და სხვა. აღნიშნულ ქვეყნებში წინასწარი პატიმრობის გამოყენება ეკონომიკური და ფინანსური დანაშაულისთვის უკიდურესად შეზღუდულია.

საერთაშორისო პრაქტიკით, წინასწარი პატიმრობა უნდა გამოიყენებოდეს, როგორც დანაშაულის აღკვეთის ღონისძიების უკიდურესი ზომა. ევროპის ქვეყანათა უმეტესობაში, წინასწარი პატიმრობა ეკონომიკური და ფინანსური დანაშაულისთვის უკიდურესად შეზღუდულია, რადგან ასეთი ტიპის დანაშაულებზე დეკრიმინალიზაციის პროცესს პროგრესული ტრენდი აქვს, რაც ითვალისწინებს თავისუფლების აღკვეთის, როგორც სასჯელის ფორმის გამოყენების შეზღუდვას.