ქალთა ინიციატივების მხარდამჭერი ჯგუფის (WISG) უახლესი კვლევის მიხედვით, რომელიც საქართველოს მასშტაბით ჩატარდა, გამოკითხულთა 3/4-ზე მეტი თანახმაა ჰომოსექსუალ ადამიანებს საგანმანათლებლო დაწესებულებებში მუშაობის უფლება შეეზღუდოთ.

დებულებას, რომელიც ამბობს, რომ ჰომოსექსუალებს არ უნდა ჰქონდეთ ბავშვებთან და მოზარდებთან მუშაობის უფლება სრულიად ეთანხმება 67,3% და მხოლოდ ნაწილობრივ იზიარებს 12,9%.

საკითხის მიმართ ნეიტრალურადაა განწყობილი 4,5%, ნაწილობრივ არ იზიარებს და 5,9%, ხოლო 9,4 პროცენტი ლგბტი ადამიანებისთვის საგანმანათლებლო სივრცეში მუშაობის უფლების შეზღუდვის წინააღმდეგია.

კვლევის მიხედვით, ჰომოფობიურ დებულებას სოფელში ბევრად მეტი მხარდამჭერი ჰყავს, ვიდრე თბილისში და რეგიონებში.

WISG-ის ინფორმაციით, ანტიდისკრიმინაციული კანონის მიღების შემდეგ, პოლიტიკოსთა და სასულიერო პირთა ნაწილი აპროტესტებდა კანონს, რომელიც აკრძალავდა საგანმანათლებლო დაწესებულებებში ჰომოსექსუალების გათავისუფლებას მათი ორიენტაციის გამო, რადგანაც ისინი გეებს პედოფილებთან აიგივებდნენ.

ჰაინრიხ ბიოლის ფონდმა ევროკავშირის ფინანსური მხარდაჭერით 3 წლიანი პროექტი დაიწყო, რომელიც საქართველოსა და სომხეთში ჰომოფობიური განწყობების გაქრობას, მოქალაქეების ცნობიერების ამაღელბასა და ლგბტ ადამიანების საზოგადოებრივ ცხოვრებაში სრულფასოვან ჩართვას ისახავს მიზნად.

პროექტის ფარგლებში ქალთა ინიციატივების მხარდამჭერმა ჯგუფმა (WISG) ჩაატარა კვლევა, რომელშიც მონაწილეობა მიიღო 2,000-მა რესპონდენტმა საქართველოს მასშტაბით.

პროექტის პარტნიორები არიან: ქალთა ინიციატივების მხარდამჭერი ჯგუფი (WISG) და ადამიანის უფლებების სწავლებისა და მონიტორინგის ცენტრი (EMC) საქართველოში და საზოგადოება ძალადობის გარეშე (SWV) და საჯარო ინფორმირება და ცოდნის აუცილებლობა (PINK) სომხეთში.