ახლახან BBC-ზე კაცხის სვეტის შესახებ სტატია გამოქვეყნდა. სტატიაში საუბარია კაცხის სვეტის ისტორიის, გეოგრაფიისა და სვეტზე მდგომი ორი პატარა ეკლესიის შესახებ. "40 მეტრის სიმაღლის კაცხის სვეტზე ასასვლელად გაბედული ბერები რთულ გზას გადიან, მიზანი კი ღმერთთან მიახლოებაა", — ვკითხულობთ სტატიაში.

სტატიის ავტორი თბილისიდან კაცხის სვეტამდე გავლილ გზას აღწერს, შემდეგ კი სვეტისა და მასზე მდებარე ეკლესიებამდე მისასვლელ რთულ გზაზე გვესაუბრება. სტატიის ავტორი კაცხის სვეტის ისტორიისა და მნიშვნელობის შესახებ იქ მცხოვრებ მამა ილარიონსაც გაესაუბრა.

ფოტო: Nika Ergemlidze

"ზოგიერთ ბერს სურს, რომ ყველა მიწიერ სიამოვნებაზე უარი თქვას და სვეტზე ილოცოს. ჩვენ ვგრძნობთ, რომ ასეთი სიმაღლე ღმერთთან გვაახლოებს. ეს სვეტი ჭეშმარიტი ჯვრის სიმბოლოა", — ამბობს მამა ილარიონი.

სტატიის ავტორმა მკითხველებს კაცხის სვეტზე ასვლის გამოცდილებაც გაუზიარა. "თავიდან, როცა სვეტზე ასვლაზე ვფიქრობდი, ძალიან მეშინოდა, რადგან კიბეს მხოლოდ თხელი მეტალის კონსტრუქცია იცავს. შემდეგ კი მამა ილარიონმა მითხრა, რომ მწვერვალზე ფოკუსირება ასვლაში გვეხმარება. მამა ილარიონმა ისიც გამიმხილა, რომ სვეტზე პირველად ასვლისას ქვემოთ ყურებას ვერ ბედავდა. ახლა კი ამ რთულ გზას ისე შეეჩვია, რომ 15-20 წუთში დამცავი აღჭურვილობის გარეშე სვეტზე ასვლა შეუძლია", — წერს სტატიის ავტორი.

შეგახსენებთ, რომ კაცხის სვეტი 2006 წლიდან ეროვნული მნიშვნელობის კატეგორიის კულტურის უძრავი ძეგლების სიაშია. 2007 წლიდან კი კულტურული მემკვიდრეობის დაცვის და გადარჩენის ფონდის დაფინანსებით, სვეტზე არსებულ ნაგებობებს სარეაბილიტაციო სამუშაოები ჩაუტარდა.