ბეჭდების მბრძანებლის ფილმების ტრილოგიის ვარსკვლავები Amazon-ის გადაღებული სერიალის, ძალაუფლების ბეჭდების, კრიტიკას გამოეხმაურნენ. ელაიჯა ვუდმა, რომელმაც პიტერ ჯექსონის 20 წელზე მეტი ხნის წინ გამოსულ ფილმებში ჰობიტ ფროდო აბგელის როლი განასახიერა, ტვიტერზე ცოტა ხნის წინ ფოტო გამოაქვეყნა. ფოტოზე იგი ტრილოგიის სხვა მსახიობებთან — დომინიკ მონაჰენთან და ბილი ბოიდთან — ერთად ჩანს. სამივე მათგანის მაისურზე ჯადოსნური არსებების სხვადასხვა ფერის ყურებია გამოსახული.

"შენ აქ გულთბილად მიგიღებთ", — წერს ვუდი პოსტის აღწერაში.

მოგვიანებით, იმავე აღწერითა და მსგავსი ილუსტრაციით გაფორმებული ქუდით ფოტო გამოაქვეყნა ბეჭდების მბრძანებლის კიდევ ერთმა ვარსკვლავმა, შონ ესტინმაც.

სხვათა შორის, "გულთბილად მიგიღებთ" მაისურებსა და ქუდზე ელფურ ენაზეც წერია.

რაც შეეხება ძალაუფლების ბეჭდების კრიტიკას — სერიალმა ეს დიდწილად მსახიობების შერჩევის გამო დაიმსახურა. მაყურებელთა ნაწილმა მრავალფეროვანი სამსახიობო გუნდი გააპროტესტა და აღნიშნა, რომ ეს ორიგინალურ ნაწარმოებთან შეუსაბამოა.

აღსანიშნავია, რომ ძალაუფლების ბეჭდებში მოქმედება ბეჭდების მბრძანებლის ტრილოგიამდე ათასობით წლით ადრე, შუახმელეთის მეორე ეპოქაში ვითარდება, შესაბამისად, ნაცნობ არსებებთან ერთად ახალ სახეებსაც ვეცნობით. თუმცა, ნაცნობი სახეებიც — მათ შორის, ჰობიტები — განსხვავებულად არიან წარმოჩენილები.

სერიალის კრიტიკოსებს შორის იყო მილიარდერი ილონ მასკი, რომელმაც ტვიტერზე დაწერა, რომ "ტოლკინი საფლავში ბრუნავს".

თუმცა, ძალაუფლების ბეჭდები ბევრმა დაიცვა. მაგალითად — მსოფლიოში აღიარებულმა ფენტეზი მწერალმა, ნილ გეიმანმა, რომელიც, ამავდროულად, ტოლკინისტიცაა. გეიმანმა პირდაპირ განაცხადა, რომ ვისაც სერიალის სამსახიობო გუნდთან დაკავშირებული პრეტენზია ჰქონდა, "ან რასისტია, ან ტოლკინი არ წაუკითხავს".

ძალაუფლების ბეჭდები კი უსაფუძვლო კრიტიკას ნამდვილად არ დაუბრკოლებია, რომ რეკორდები მოეხსნა. სერიალის საპრემიერო ეპიზოდები 25-მა მილიონმა ადამიანმა ნახა. პროექტმა კრიტიკოსების მოწონებაც დაიმსახურა — მაგალითად, Rotten Tomatoes-ზე სერიალი 84-მა პროცენტმა დადებითად შეაფასა.