როგორც სახელმწიფო აუდიტის სამსახურის ყოფილი ხელმძღვანელი, ლაშა თორდია წერს, სტატუსი 4-წლიანი პროცესის შემდეგ მიანიჭეს.

რატომ არის მნიშვნელოვანი: თორდიას 2017 წლის 12 მაისს თავს დაესხნენ, რაშიც ოთარ ფარცხალაძეს ადანაშაულებდა.

  • თორდიას მიაჩნდა, რომ თავდასხმა აუდიტის სამსახურის მიერ ყოფილი პროკურორის შესახებ მასალების მოგროვებას უკავშირდებოდა. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.
  • მაშინ ბრალდებების პასუხად ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

არქივიდან: შსს-მ გამოძიება იმავე დღეს 126-ე მუხლით დაიწყო, რაც ძალადობას გულისხმობს. 2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ფარცხალაძე დაკითხეს.

  • ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

  • სასამართლომ 2021 წელს თორდიას ცემაში ბრალდებული ფარცხალაძე გაამართლა.

  • საქმეზე ბრალდებულ კიდევ ერთ პირს, ფინანსური პოლიციის ყოფილ თანამშრომელ მიხეილ ჩოხელს სასამართლომ 5 000-ლარიანი ჯარიმა დააკისრა.