მთავარი პროკურატურა აცხადებს, რომ ევრომოსამართლის, ნონა წოწორიას ძმის, ოთარ წოწორიას სახლში, იარაღის აღმოჩენის ბრალდებით დაწყებულ სისხლის სამართლის საქმეზე შეწყდა გამოძიება, სისხლის სამართლის პასუხისგებაში მისაცემი პირის გარდაცვალების გამო.

პროკურატურა აცხადებს, რომ ჩატარებული გამოძიებით დადასტურდა ოთარ წოწორიას სიმამრის დანაშაულის ჩადენის ფაქტი, მაგრამ იგი 2017 წლის 11 მაისს გარდაიცვალა:

"ოთარ წოწორიას სახლში უკანონოდ ინახებოდა ცეცხლსასროლი იარაღი და საბრძოლო მასალა, დაიწყო გამოძიება სისხლის სამართლის კოდექსის 236-ე მუხლის მე-2 ნაწილით. იმავე დღეს, გამოძიების მიერ, გადაუდებელ შემთხვევაში, ჩატარდა ოთარ წოწორიას საცხოვრებელი სახლის ჩხრეკა, რომელსაც ოთარ წოწორიასთან ერთად ესწრებოდა მისი ადვოკატი. ჩხრეკის შედეგად ამოიღეს რევოლვერი და სხვადასხვა სახის 227 ვაზნა. რევოლვერის და ვაზნების ვარგისიანობის დადგენის მიზნით საქმეზე დაინიშნა და ჩატარდა ბალისტიკური ექსპერტიზა. ექსპერტიზით დადგინდა, რომ ამოღებული რევოლვერი დამზადებულია კუსტარული წესით, მაგრამ არ არის ვარგისი სროლისთვის და არ მიეკუთვნება ცეცხლსასროლ იარაღთა კატეგორიას, ხოლო ამოღებული ვაზნები მიეკუთვნება საბრძოლო მასალათა კატეგორიას და ვარგისია გამოსაყენებლად. ჩვენებების საფუძველზე დადგინდა, რომ ამოღებული ნივთები ეკუთვნოდა ოთარ წოწორიას სიმამრს".

ოთარ წოწორია ევროსასამართლოს მოქმედი მოსამართლის ნონა წოწორიას ძმაა. იგი ამბობს, რომ თავისივე სახლიდან ამოღებული სანადირო თოფები მისი საკუთრებაა, სხვა ნივთები - არა. ოთარ წოწორია სახლის ჩხრეკას, დის საქმიანობას უკავშირებს და მომხდარს "ანგარიშსწორებას" უწოდებს.