ფეისბუკზე ევროსასამართლოს მოსამართლის, ნონა წოწორიას, სახელით გამოქვეყნებულ განცხადებაში, წერია, რომ ის ძმის სახლის ჩხრეკას თავის საქმიანობას უკავშირებს. On.ge ცდილობს აღნიშნული განცხადების ავთენტურობის დადგენას.

განცხადება ქართულ და ინგლისურ ენებზეა გამოქვეყნებული, რომელშიც წერია, რომ შსს-ს მიერ ამოღებული პისტოლეტისა და ვაზნების წარმომავლობა მისი ოჯახისთვის უცნობია და მისი ძმის ან ოჯახის რომელიმე სხვა წევრის საკუთრებას არ წარმოადგენენ:

"ჩემს ძმას არასდროს ჰქონია კანონთან რამე პრობლემა და არ არის ნასამართლევი. ჩემი ოჯახისთვის თავისუფლება, პატიოსნება, შრომისმოყვარეობა და კანონმორჩილება ყოველთვის იყო, არის და იქნება მთავარი ღირებულებები.

მაქვს საფუძველი ვიფიქრო, რომ აღნიშნული ქმედებები უკავშირდება ჩემს საქმიანობას ადამიანის უფლებათა და თავისუფლებათა დაცვის ევროპულ სასამართლოში. მსურს განვაცხადო, რომ ვერაფერი მოახდენს გავლენას ჩემს მიერ სამოსამართლეო ფუნქციების განხორციელებაზე და კვლავაც შევიტან წვლილს საქართველოში დემოკრატიის და ადამიანის უფლებების განმტკიცების საქმეში".

ნონა წოწორია ვანო მერაბიშვილისა და გიგი უგულავას საქმის განხილვაში მონაწილეობს. შინაგან საქმეთა სამინისტროს ცნობით, ევროსასამართლოს მოსამართლის ძმის სახლიდან პისტოლეტი და ვაზნები ამოიღეს.

ევროპული საქართველოს დეპუტატი, ოთო კახიძის მიიჩნევს, რომ წოწორიას ძმის სახლის ჩხრეკა სერიოზულ ეჭვს ბადებს. ევროსასამართლოს მოსამართლის ძმა, ოთარ წოწორია ამბობს, რომ თავისივე სახლიდან ამოღებული სანადირო თოფები მისი საკუთრებაა, სხვა ნივთები - არა.