პაპუა-ახალი გვინეის ახალარჩეულმა პრემიერმინისტრმა საზოგადოებას მინისტრთა კაბინეტი წარუდგინა. ახალ სახეებთან ერთად პრემიერმინისტრმა ჯეიმს მარაპემ ახალი თანამდებობები წარადგინა და ყავისა და პალმის ზეთის მინისტრები დანიშნა.

მარაპემ, რომელმაც არჩევნები გაყალბების შესახებ ბრალდებების ფონზე მოიგო, აღნიშნა, რომ ახალი თანამდებობების შექმნა ქვეყნისთვის მნიშვნელოვანი ინდუსტრიების განვითარებას დაეხმარება. პრემიერმინისტრის თქმით, სახელმწიფომ ხალხი უნდა წაახალისოს, რათა უფრო მეტი ადამიანი ჩაერთოს სოფლის მეურნეობაში.

პაპუა-ახალ გვინეაში შექმნილი ყავის მინისტრის თანამდებობა მსოფლიოში პირველია. პრემიერმინისტრის თქმით, ყავის მინისტრი ყავის ინდუსტრიაზე იზრუნებს. აღსანიშნავია, რომ პაპუა-ახალი გვინეის ყავაზე მოთხოვნა გაზრდილია აშშ-ში, ავსტრალიასა და იაპონიაში. პალმის ზეთისა და ყავის მინისტრების გარდა, ქვეყანას ცალკე ჰყავს სოფლის მეურნეობის მინისტრიც.