საქართველოს ახალგაზრდა იურისტთა ასოციაციამ თბილისის საქალაქო სასამართლოს იმიმართა.

რატომ არის მნიშვნელოვანი: ცესკოს განკარგულებით, პირველ ოქტომბერს სენაკში შუალედური არჩევნები გაიმართება.

• არჩევნები მაჟორიტარული საარჩევნო სისტემით #64.04 ადგილობრივ მაჟორიტარულ საარჩევნო ოლქში, სამ საარჩევნო უბანზე ჩატარდება.
• შუალედური არჩევნები სენაკის საკრებულოს გამოკლებული წევრის ასარჩევად ტარდება. ვახტანგ წურწუმიას საკრებულოს წევრის უფლებამოსილება ვადამდე, 31 მაისს შეუწყდა.

საია მიიჩნევს, რომ სენაკში საკრებულოს შუალედური არჩევნების დანიშვნა კანონს არ შეესაბამება, რადგან ეს საკრებულო უკვე 6 თვეზე მეტია არ შეკრებილა. მათი თქმით, 9 და 23 თებერვლის სხდომები სათანადო კვორუმის არარსებობის გამო ლეგიტიმური არ იყო,

• ორგანიზაციაში ამბობენ, რომ სენაკის საკრებულოს უფლებამოსილების შეწყვეტის უპირობო საფუძველი და შესაბამისად, მუნიციპალიტეტში რიგგარეშე არჩევნების დანიშვნის წინაპირობები არსებობს.
• ადგილობრივი თვითმმართველობის კოდექსის მიხედვით, საკრებულოს უფლებამოსილება ვადამდე შეუწყდება, თუ ის ზედიზედ 6 თვის განმავლობაში არ შეიკრიბება.

სენაკის საკრებულო ერთ-ერთი იყო იმ 6-დან, სადაც ვერც ერთმა პარტიამ დამოუკიდებლად უმრავლესობა ვერ მოიპოვა. საკრებულომ იქ წარმოდგენილ პოლიტიკურ ძალებს შორის კონსენსუსის არარსებობის გამო, ფუნქციონირება ვერ დაიწყო.

• ორგანიზაციაში ამბობენ, რომ სენაკის მუნიციპალიტეტის წარმომადგენლობითი ორგანო ბოლოს 2021 წლის 17 დეკემბერს შეიკრიბა.

• რის შემდეგაც იყო სხდომის ჩატარების 10-ზე მეტი მცდელობა, თუმცა ისინი, კვორუმის არარსებობის გამო, ვერ გაიმართა.

• საიას თქმით, 9 თებერვალს სენაკის საკრებულოს 16 ოპოზიციონერი დეპუტატი, შეიკრიბა საკრებულოს სხდომათა დარბაზში. მიუხედავად იმისა, რომ სხდომის გახსნის კვორუმი არ ჰქონდათ.

გარდა ამისა, 23 თებერვალს სენაკის საკრებულოს თავმჯდომარე გახარიას გუნდის წევრი აირჩიეს, ქართული ოცნების საკრებულოს წევრებმა კი დარღვევებზე ისაუბრეს და სასამართლოს მიმართეს.

• საიას თქმით, ამჟამად საქმე კვლავ სასამართლო განხილვაშია, ხოლო სენაკის საკრებულოს სხდომის ჩატარება 23 თებერვლის შემდეგ აღარ უცდია.

პარლამენტმა მაისში შეიტანა ცვლილებები ადგილობრივი თვითმმართველობის კოდექსში — ბათუმისა და სენაკის საკრებულოებში სხდომის გახსნასთან დაკავშირებული კვორუმის პრობლემა იხსნებოდა იმით, რომ საკრებულოს წევრებად ავტომატურად ჩაითვლებოდნენ საარჩევნო კომისიის სამართლებრივი აქტით ასეთად ცნობილი პირები.

• ამის მიუხედავად, სენაკის საკრებულომ მაინც ვერ შეძლო შეკრება, ვინაიდან საკანონმდებლო ცვლილებებიდან რამდენიმე დღეში საკრებულოს ერთ-ერთმა მაჟორიტარმა წევრმა, ერთიანი ნაციონალური მოძრაობიდან მანდატი დატოვა.

პარტია საქართველოსთვის განცხადებით, ცესკომ იმოქმედა ხელისუფლების ინტერესით და ნაცვლად იმისა, სენაკის მუნიციპალიტეტში საკრებულოს ახალი არჩევნების დანიშვნაზე ემსჯელა, შუალედური არჩევნები მხოლოდ იმ სამაჟორიტარო ოლქში დანიშნა.

• პარტიიის ერთ-ერთი წევრის ნათია მეზვრიშვილის თქმით, ეს ის ოლქია სადაც "ოცნებამ" ოპოზიციის წევრს, კრიმინალური სამყაროს ჩართულობით, მანდატი დაატოვებინა.