თბილისის ზოოლოგიური პარკის ახალ ტერიტორიაზე პირველი ვოლიერი იხსნება. პირველი ბინადრები კავკასიაში გავრცელებული ცხოველები - დათვები და მგლები არიან. ვოლიერი გერმანიის მთავრობის დაფინანსებით აშენდა და მისი გახსნის ოფიციალური ცერემონია 18 მაისს, ხუთშაბათს, 13:00 საათზე გაიმართება.

თბილისის ზღვის მიმდებარე ტერიტორიაზე მდებარე ახალი ვოლიერის ფართობი 1 ჰექტარზე მეტია. ახალ ტერიტორიაზე უკვე გადაყვანილია 4 მგელი და 3 დათვი.

ზოოპარკის პრესსამსახურში ამბობენ, რომ შემდეგ ეტაპზე ახალ ზოოპარკში ირმები და ნიამორები დაიდებენ ბინას და მათი ვოლიერიც გერმანიის მთავრობის დაფინანსებით შენდება.

ზოოპარკის დირექტორი ზურაბ გურიელიძე ამბობს, რომ ახალ ვოლიერში იმ დათვებსაც შეიფარებენ, რომლებიც დატყვევებულები არიან კერძო პირებთან, ან სხვადასხვა დაწესებულებაში და აუტანელ პირობებში უწევთ არსებობა.

"ახალ ვოლიერში დაახლოებით 10 მათგანს შევიფარებთ და დავიხსნით გაუსაძლისი ყოფისგან. გარდა ამისა, ვგეგმავთ დაობლებული ბელების ბუნებაში დაბრუნების პროგრამის განხორციელებას. სპეციალურად პატარებისთვის აგებულ ვოლიერში მოხდება ცხოველის რეინტროდუქციისთვის მომზადება მისი ბუნებაში დაბრუნების მიზნით. ეს უდიდესი წინგადადგმული ნაბიჯი იქნება გარემოსდაცვით საქმიანობაში. დიდი მადლობა გერმანიის მთავრობას, რომ მოგვცა ჩვენი გეგმების რეალიზაციის შესაძლებლობა" - ამბობს ზურაბ გურიელიძე.

ზოოპარკის პრესსამსახურში ამბობენ, რომ ახალი ზოოპარკის ინფრასტრუქტურის სრულ მოწესრიგებამდე, ცხოველების დათვალიერება საცხენოსნო ტურების ფარგლებში იქნება შესაძლებელი.

2015 წლის 13 ივნისის სტიქიამდე ზოოპარკში, თევზების ქვეწარმავლებისა და ფრინველების ჩათვლით, 1 155 ცხოველი ცხოვრობდა, სტიქიის შედეგად კი 281 მათგანი დაიღუპა. აქამდე ზოოპარკს ახალ ტერიტორიაზე გადასასვლელად საკმარისი ფული არ ჰქონდა.

გმირთა მოედნის მიმდებარედ არსებულ ზოოპარკის ამჟამინდელ ტერიტორიაზე, ადგილის სიმცირის გამო (5 ჰა) შეუძლებელია შემდგომი განვითარება, ცხოველების კოლექციის გამდიდრება და სრულყოფილი ინფრასტრუქტურის მოწყობა. ახალი ტერიტორია (48 ჰა) საერთაშორისო სტანდარტების ზოოპარკის აშენების შესაძლებლობას იძლევა - დიდი და კეთილმოწყობილი ვოლიერების უმრავლესობა თხრილებით, არხებითა და მსუბუქი კონსტრუქციებით შემოისაზღვრება; არსებული ლანდშაფტი ცხოველების ბუნებრივ საცხოვრებელ არეალთან მიმსგავსებულ გარემოს შექმნის, ხოლო დამთვალიერებლისთვის მეტად საინტერესო საგანმანათლებლო-დასასვენებელი სივრცე მოეწყობა.