მედიების მიერ გავრცელებული ინფორმაციით, კოლონიაში 193 ადამიანი იყო, დაბომბვას 53 უკრაინელი ჯარისკაცის სიცოცხლე ემსხვერპლა, 75 კი დაშავდა.

რატომ არის მნიშვნელოვანი: უკრაინული მხარე აცხადებს, რომ ტერიტორია რუსებმა დაბომბეს, რუსული სახელმწიფო მედია კი ამას უკრაინას აბრალებს.

რას ამბობს უკრაინული მხარე: Ukrainska Pravda-ს დაზვერვის წყაროებმა განუცხადეს, რომ საარტილერიო თავდასხმა ლენევკას მიმართულებით დაფიქსირდა დამპყრობლების მხრიდან.

  • სხვა წყაროები უკრაინულ მედიას უყვებიან, რომ ამ კოლონიაში აზოვის მებრძოლები დაბომბვამდე რამდენიმე დღით ადრე გადაიყვანეს.

რას ამბობს რუსული მხარე: დონეცკის დე ფაქტო რესპუბლიკის ხელმძღვანელი დენის პუშლინი ამტკიცებს, რომ "კიევის რეჟიმი მიზანმიმართულად ანადგურებს უკრაინელებს, რომლებიც ჩაბარდნენ, რათა დონბასის მშვიდობიანი მოსახლეობის წინააღმდეგ ჩადენილი სამხედრო დანაშაულების კვალი დაფარონ".

  • მისივე მტკიცებით, ამით უკრაინა დანარჩენ მებრძოლებს აიძულებს განაგრძონ საბრძოლო მოქმედებები და არ ჩაბარდნენ.

კონტექსტი: 11 ივლისს უკრაინულმა მედიამ დაზვერვის წყაროზე დაყრდნობით გაავრცელა ინფორმაცია, რომ ოკუპანტებს ტყვეობაში მყოფი აზოვის ორი მცველის სიკვდილით დასჯა სურთ.

ფართო სურათი: ალყაში მოქცეული მარიუპოლის მცველები ქალაქს დიდი ხნის განმავლობაში არ უთმობდნენ რუსეთის არმიას. მათი თავგანწირვა მთელი მსოფლიოსთვის მაგალითი გახდა.

  • აზოვსტალის ტერიტორიის დატოვების შემდეგ, ოკუპანტებმა მებრძოლები ტყვედ აიყვანეს.