განცხადებას საადვოკატო ფირმა MKD Law ავრცელებს.

რატომ არის მნიშვნელოვანი: ეს მეორე საჯარო განცხადებაა ივანიშვილის პოლიტიკიდან წასვლის შემდეგ.

• ექსპრემიერი საუბრობს ისეთ თემებზე, როგორიცაა ხელისუფლების მუშაობა, ელჩთან სავარაუდო შეხვედრა და დავა შვეიცარიულ ბანკთან.
• ის იმეორებს მმართველი გუნდის ანტიდასავლურ ნარატივს ომში ჩათრევის მცდელობაზე.
• ივანიშვილი არ ეხმაურება ევროკომისიის რეკომენდაციებს და ჩანაწერს დეოლიგარქიზაციაზე.

რა წერია განცხადებაში: შესავალში ის საზოგადოებაზე საუბრობს და ამბობს, რომ დამოუკიდებლობის აღდგენიდან 30 წლის თავზე, ხალხმა კიდევ ერთხელ აჩვენა, რომ "ღირსება, თავისუფლება და დამოუკიდებლობა მისი უმთავრესი ღირებულებებია".

• მისივე აზრით, საზოგადოებამ ყველას დაუმტკიცა, რომ ხანმოკლე დემოკრატიული გამოცდილების მიუხედავად, აქვს სიბრძნე, რომელიც ურთულეს გამოწვევებთან ღირსეულად გამკლავების შესაძლებლობას აძლევს.
• ამის შემდეგ ის სხვადასხვა საკითხს მიმოიხილავს, რომელსაც ეტაპობრივად გაგაცნობთ.

პოლიტიკიდან წასვლის შემდეგ: ივანიშვილი ამტკიცებს, რომ წელიწადნახევრის განმავლობაში ამ გადაწყვეტილებას სრულად იცავდა და იცავს და არ უნდა, მისმა ფაქტორმა რამეზე გავლენა იქონიოს.

• მისივე მტკიცებით, სრულად დისტანცირებულია, თუმცა, როგორც მოქალაქე მიმდინარე მოვლენებს ყურადღებით ადევნებს თვალყურს.
• "მთელი ამ პერიოდის მანძილზე, ერთადერთი საჯარო განცხადება გამოვაქვეყნე და ისიც მხოლოდ იმისათვის, რომ ჩემი სახელით სპეკულირების საშუალება არავისთვის მიმეცა".
• "არ მინდოდა, პოლიტიკურ პროცესებზე არათუ მე, თუნდაც, ჩემს ფაქტორს რაიმე გავლენა ჰქონოდა და საჯარო სივრციდან ჩემი სრული დისტანცირების მიზეზი სწორედ ეს იყო და არის".

ნარატივი ომში ჩათრევაზე: ივანიშვილი კმაყოფილია ხელისუფლების მუშაობით —ამტკიცებს, თითქოს "გარკვეული ძალები საქართველოს ომში ჩათრევას აქტიურად ცდილობდნენ", რაც მმართველმა გუნდმა აირიდა.

• "რეგიონში არსებული ურთულესი პოლიტიკური ვითარების ფონზე, საქართველოს და მის მმართველ გუნდს გასული თვეების განმავლობაში ძალზე მტკივნეული პროცესების გავლა უწევდა და უწევს".
• "საქართველოსთვის და მისი ხელისუფლებისთვის ვითარებას განსაკუთრებით ართულებს ის გარემოება, რომ გარკვეული ძალები საქართველოს ომში ჩათრევას აქტიურად ცდილობდნენ და მათი ეს სურვილი და მიზანი, სამწუხაროდ, დღესაც აქტუალურია".
• "უდიდესი სირთულეების მიუხედავად, მმართველმა გუნდმა სწორად იმუშავა, სწორი და პრინციპული პოზიცია დაიკავა და მთავარი სირთულე, ომის საფრთხის პირველი ეტაპი უკვე გადალახა".
• აქვე ის აღნიშნავს, რომ "ომში ჩათრევის უშუალო საფრთხე დღეს მაქსიმალურად არის განეიტრალებული", თუმცა ავითარებს მოსაზრებას, თითქოს უკრაინაში ომის დასრულებამდე, "გარკვეული რისკები ჯერ კიდევ რჩება".

პარტნიორებთან ურთიერთობა: ამ ნარატივის შემდეგ, პოლიტიკიდან წასული ივანიშვილი რჩევას აძლევს მმართველ გუნდს, იზრუნოს, რომ სტრატეგიულ პარტნიორებთან ურთიერთობები არ დაზიანდეს.

• "ამასთან, დღეს, როდესაც ომის უშუალო საფრთხე უკვე მაქსიმალურად არის განეიტრალებული, მიმაჩნია, რომ მმართველ გუნდს აქვს შესაძლებლობა, თავისი ყურადღება მეტწილად კიდევ ერთ უმნიშვნელოვანეს პრიორიტეტზე გადაიტანოს და იზრუნოს, რომ საქართველოს ურთიერთობები სტრატეგიულ პარტნიორთან, ამერიკის შეერთებულ შტატებთან და ევროკავშირთან არ დაზიანდეს".

დავა შვეიცარიულ ბანკთან: ივანიშვილი ვრცლად საუბრობს ამ საკითხზე და თან ამტკიცებს, თითქოს ურჩევნია, საზოგადოებამ ეს მის პირად პრობლემად განიხილოს. ამავდროულად ამბობს, რომ ამას საქართველოში მიმდინარე პროცესებთან პირდაპირი კავშირი აქვს.

• "თუმცა, გამომდინარე იქიდან, რომ საქართველომ რთულ სიტუაციას, პრაქტიკულად, თავი უკვე გაართვა და ომის უშუალო საფრთხე გადაიარა, მირჩევნია, ჩემი და შვეიცარიული ბანკის ურთიერთობა ჩემ პირად პრობლემად დავტოვო და ეს პრობლემა საზოგადოებას ზედმეტად თავს არ მოვახვიო".
• "აქ იმასაც არა აქვს მნიშვნელობა, თუ რაზე ვგეგმავდი შვეიცარიული ბანკის მიერ გაჩერებული თანხების დახარჯვას — კერძო მიზნებისთვის თუ საზოგადოებრივი საჭიროებისთვის".
• "ჩემთვის მთავარია, საქართველომ შეძლოს ურთულესი ვითარებიდან საბოლოოდ სათანადოდ გამოსვლა და მშვიდობის შენარჩუნება, ჩემ პირად საკითხზე კი, მე თავად ვიზრუნებ და ამ პრობლემით საზოგადოების ზედმეტად დატვირთვას არ შევეცდები".

შეხვედრა ელჩთან: ექსპრემიერი ამტკიცებს, რომ ეს შეხვედრა ელჩის ინიციატივით შედგა და 3 საათი გაგრძელდა.

• "დასასრულს, რადგან საჯაროდ დაისვა შეკითხვა უკრაინაში ომის დაწყების შემდეგ ჩემსა და ამერიკის ელჩს შორის შეხვედრის გამართვის შესახებ, საზოგადოებას მინდა განვუმარტო, რომ ამგვარი შეხვედრა ელჩის თხოვნით 21 მარტს ნამდვილად შედგა და ის დაახლოებით სამ საათს გაგრძელდა".
• ელჩან შესაძლო შეხვედრაზე კითხვა პარტიიდან წასულმა დეპუტატებმა დასვეს და პასუხს ითხოვდნენ.
• დეტალურად ამ სკითხზე შეგიძლიათ წაიკითხოთ აქ.