რუსეთის ჭადრაკის ფედერაციის განცხადებით, ტურნირის ორგანიზატორებისგან უსაფრთხოების დაცვის გარანტიები მიიღეს, ამიტომ "ოფიციალური დელეგაციის" საქართველოში გაგზავნას გეგმავენ.

რატომ არის მნიშვნელოვანი: უკრაინაში ომის დაწყების შემდეგ, მსოფლიოს არაერთმა ქვეყანამ და ფედერაციამ რუსეთის წარმომადგენლებს ქვეყნის სახელით შეჯიბრებებში მონაწილეობა აუკრძალა.

  • მათ შეუძლიათ კონკრეტულ ტურნირებში ჩართვა, თუმცა სახელმწიფო სიმბოლიკის გარეშე.
  • რუსეთის ჭადრაკის ფედერაციის საბჭოს წევრების ნაწილი დუმის მოქმედი და ყოფილი დეპუტატები არიან.

დეტალები: რუსეთის და საქართველოს ჭადრაკის ფედერაციების ვებგვერდზებზე გამოქვეყნებული ინფორმაციის მიხედვით, ჩემპიონატი 15-28 სექტემბერს ბათუმში ჩატარდება.

  • რუსული მხარე ამბობს, რომ მანამდე, 5-17 სექტემბერს ჩემპიონატი რუმინეთშიც იმართება, თუმცა "ოფიციალურ დელეგაციას" იქ არ გზავნიან.
  • მიზეზად იმას ასახელებენ, რომ ე.წ. არამეგობრული ქვეყანაა და თითქოს იქ რუსეთის მოქალაქეებისთვის უსაფრთხოების რისკები არსებობს.
  • თუმცა, ამავდროულად, რუმინეთში წასვლის უფლებას აძლევენ მათ, ვინც საკუთარ უსაფრთხოებაზე აიღებს პასუხისმგებლობას.
  • რუსული გამოცემა, რომელიც საჭადრაკო ამბებს აშუქებს, წერს, რომ საქართველო რუს მოჭადრაკეებს "ხელგაშლილი ელოდება".

საქართველოს ჭადრაკის ფედერაციის განცხადებით, ტურნირი საერთაშორისო ფედერაციის (FIDE) ეგიდით ტარდება.

  • როგორც მათ On.ge-ის განუმარტეს, ორგანიზაციის გადაწყვეტილებით, რუს და ბელარუს მოჭადრაკეებს შეუძლიათ საერთაშორისო ტურნირებში ასპარეზობა, მაგრამ არა ქვეყნის სახელით.
  • ფედერაციაში ამბობენ, რომ ტურნირზე არც რუსეთის დროშა იქნება წარმოდგენილი.
  • მათივე განმარტებით, ორგანიზატორი საქართველოა, თუმცა ფედერაციას არ განუცხადებია, რომ განსაკუთრებულად დაიცავს ვინმეს — შესაბამისად, რუსული მხარის ფრაზა უსაფრთხოების გარანტიებზე "საერთო სტანდარტული შაბლონია".
  • "როდესაც რომელიმე ქვეყანა აცხადებს პრეტენზიას ტურნირის და ასპარეზობის გამართვაზე, ის თავისთავად იძლევა გარანტიებს, რომ ჩასულ მონაწილეებს საფრთხე არ ემუქრებათ".