სახალხო დამცველის წარმომადგენელმა სოსო გოგაშვილის მონახულების შემდეგ განაცხადა, რომ მას სახეზე აღენიშნება შეშუპება, სილურჯეები ხელის მტევნებსა და ფეხებზე. მისივე თქმით, დაზიანებები დაკავების დროს მიიღო, გოგაშვილმა კი თქვა, რომ მას შემდეგ ფიზიკურ ძალადობას ადგილი არ ჰქონია.

რატომ არის მნიშვნელოვანი: გოგაშვილი გუშინ, გვიან ღამით დააკავეს. 15 ივლისს მან პოსტი გამოაქვეყნა, სადაც თვითმმართველობის არჩევნების დროს გაყალბების მტკიცებულებებზე ისაუბრა.

  • მისი თქმით, არჩევნების გაყალბების მთლიანი სტრუქტურის შესახებ ინფორმაცია ყველა შესაბამის ორგანიზაციას, მათ შორის, დიპლომატიურ კორპუსსა და მედიას გადასცა.
  • გოგაშვილი მიუთითებს, რომ 2021 წლის შემოდგომაზე მედიასაშუალებებმა არჩევნების გაყალბების ფაქტები ნაწილობრივ გააშუქეს.
  • მისი თქმით, 13 ივლისს, გია გაჩეჩილაძის მიერ გავრცელებული ჟურნალისტებზე სავარაუდო უკანონო მიყურადების შედეგად მოპოვებული ჩანაწერის ნაწილი ერთ-ერთი სიუჟეტის მომზადების პროცესს ასახავდა.
  • გაჩეჩილაძის გავრცელებულ ჩანაწერებზე სპეციალურმა საგამოძიებო სამსახურმა 14 ივლისს გამოძიება დაიწყო.

დეტალები: ამ ეტაპზე, სხვა დეტალებზე უწყებაში არ საუბრობენ.

  • ამბობენ მხოლოდ იმას, რომ ჩხრეკა მოსამართლის განჩინების საფუძველზე ჩატარდა.
  • სოსო გოგაშვილის შვილის, ნინი გოგოშვილის სახლის ჩხრეკისას გადაღებულ ვიდეოში ჩანს, რომ სასამართლოს განჩინება გამოცემულია სსკ-ის 157-ე მუხლის მე-4 ნაწილით მიმდინარე გამოძიების ფარგლებში.
  • აღნიშნული მუხლი პირადი ან ოჯახური საიდუმლოს, პირადი ცხოვრების ამსახველი ინფორმაციის ან პერსონალური მონაცემების ხელყოფას გულისხმობს. \