ივნისში უცხოეთიდან მიღებული გზავნილების მოცულობა წლიურად $225 მილიონით არის გაზრდილი. ამასთან, მიმდინარე წლის მაისთან შედარებით გზავნილებმა $78 მილიონით იკლო.

რატომ არის მნიშვნელოვანი: ფულადი გზავნილები საქართველოში არაერთი ოჯახისთვის შემოსავლის მნიშვნელოვანი ნაწილია.

  • უცხოური ვალუტის შემოდინება ლარის გაცვლითი კურსის სიმყარესაც უწყობს ხელს.

დეტალები: ივნისის მდგომარეობით, ფულადი გზავნილების უდიდესი წილი (54%) რუსეთზე მოდის. ამ ქვეყნიდან საქართველოში გადმორიცხული თანხების მოცულობა წლიურად 492%-ით არის გაზრდილი. ტოპ-5 ქვეყნის ჩამონათვალი კი ასეთია:

  • რუსეთი — $231,4 მილიონი;
  • იტალია — $35,6 მილიონი;
  • აშშ — $27,7 მილიონი;
  • საბერძნეთი — $18,8 მილიონი;
  • ყაზახეთი — $17,3 მილიონი.

კონტექსტი: რუსეთიდან საქართველოში გადმორიცხული თანხის მოცულობამ განსაკუთრებით უკრაინაში ომის დაწყების შემდეგ მოიმატა.

  • სავარაუდოდ, ამის ერთ-ერთი მიზეზი ისიც არის, რომ გაზრდილია რუსეთის მოქალაქეების საქართველოში ვიზიტებიც.

რიცხვებში: 2022 წლის პირველ ექვს თვეში საქართველომ უცხოეთიდან 1,79 მილიარდი დოლარის ფულადი გზავნილი მიიღო, რაც წლიურად 65%-იან ზრდას ნიშნავს.

  • ამასთან, მიმდიანარე წლის იანვარ-ივნისში საქართველოდან უცხოეთში $158 მილიონია გადარიცხული — ეს მონაცემი წლიურად 14,1%-ით არის გაზრდილი.