საფრანგეთის არჩევნებში ემანუელ მაკრონის გამარჯვებამ, ევროპასა და ამერიკაში იმედი მისცა მათ, ვინც პოპულისტების და ულტრა-ნაციონალისტების წარმატების გათვალისწინებით, შეშფოთებით აკვირდებოდა მოვლენების განვითარებას.

39 წლის ემანუელ მაკრონი ნაპოლეონ ბონაპარტის შემდეგ საფრანგეთის ყველაზე ახალგაზრდა ლიდერია. საკუთარი ახალი პოლიტიკური მოძრაობით და საფრანგეთის ტრადიციული პარტიების გვერდის ავლით, მან მოახერხა წარმატებისთვის მიეღწია. მაკრონმა პოპულისტი პარტია "ეროვნული ფრონტის" ლიდერი, მარინ ლე პენი, არჩევნების მეორე ტურში დაამარცხა.

ვაშინგტონში, ჯონს ჰოპკინსის უნივერსიტეტში შეხვედრა გაიმართა, სადაც ისაუბრეს იმაზე, თუ რა მნიშვნელობა აქვს ევროკავშირის და ევროპის მომავლისთვის მაკრონის გამარჯვებას. შეხვედრაზე რომელიც "ევროპაში ლიბერალიზმის მომავალს" შეეხებოდა, ამერიკელი დიპლომატები და საერთაშორისო მიმომხილველები საუბრობდნენ.

"მაკრონმა ღია და დანარჩენი ევროპისთვის გახსნილი საფრანგეთის იდეით გაიმარჯვა. მისი გამარჯვება ბევრ რამეს უკავშირდება, თუმცა მნიშვნელოვანია, რომ მან ღია საფრანგეთის იდეა არ უარყო, პირიქით ამაზე გაამახვილა ყურადღება და წარმატებას მიაღწია. ახლა, რა თქმა უნდა კითხვა მდგომარეობს იმაში, მოახერხებს თუ არა ის დაპირებების შესრულებას და ხალხის უკმაყოფილების მთავარი მიზეზების მოგვარებას, უმუშევრობის, იმიგრაციის, ვაჭრობის და ეკონომიკური დაღმასვლის ჩათვლით. თუ ის ამას შეძლებს, ეს იქნება იმის მაგალითი, რომ პოლიტიკოსებს შეუძლიათ ღია საზოგადოების და გახსნილობის პლატფორმის იდეის წინ წამოწევით მიაღწიონ წარმატებას”, - ამბობს ენტონი ბლინკენი, აშშ-ს სახელმწიფო მდივნის ყოფილი მოადგილე.

საფრანგეთის ახალ პრეზიდენტს, რომლის მთავარი გამოწვევა დაპირებების შესრულებაა, ევროპული ერთიანობის შენარჩუნებისთვის მოუწევს ბრძოლა.

დაპირისპირებით სავსე საარჩევნო კამპანიის შემდეგ, სადაც ერთმანეთს ნაციონალიზმი და ევროპის იდეა დაუპირისპირდა, მაკრონმა მოახერხა ამ უკანასკნელის გადარჩენა. ვაშინგტონში მიმომხილველები საუბრობენ იმაზე, რომ მაკრონის პოლიტიკური პლატფორმა პასუხია უკანასკნელ პერიოდში პოპულისტების წარმატებაზე, რაც ბრექსითის - ბრიტანეთის მიერ ევროკავშირის დატოვების და აშშ-ის არჩევნების შემთხვევაში ვიხილეთ. მაკრონის ახალი მოძრაობა და შეხედულებები მაგალითია სხვა ლიდერებისთვის ევროპაში და მის მიღმა.

„ვფიქრობ, მისი გამარჯვებით ევროპის პროექტი განახლდება. მას კამპანიის განმავლობაში, ძალიან მკვეთრად ეჭირა პრო-ევროპული პოზიცია და პირველად დიდი ხნის მანძილზე, ჩვენ ვიხილეთ საჯარო ენთუზიაზმი ევროპისადმი და ეს მნიშვნელოვანია. მეორეს მხრივ, მე ვფიქრობ, ის შეძლებს რეფორმების გატარებას, რომელიც საფრანგეთს სჭირდება ფრანკო-გერმანული თანამშრომლობის განსამტკიცებლად. საფრანგეთის და გერმანიის თანამშრომლობა ევროკავშირის პროექტისთვის სასიცოცხლოა“, - განაცხადა ამერიკის ხმასთან საუბარში ლონდონის საუნივერსიტეტო კოლეჯის უფროსმა მკვლევარმა, კატრინ ფიშმა.

საფრანგეთის არჩევნებამდე 36 საათით ადრე, მაკრონის საარჩევნო შტაბის ელექტრონული მიმოწერა გავრცელდა, რომელსაც რუსეთის ქმედებებს უკავშირებენ. კამპანიის განმავლობაში, რუსეთი - მედიის, კიბერ-შეტევების და მაკრონის ოპონენტის დაფინანსების მეშვეობით შეეცადა ამერიკის მსგავსად, საფრანგეთშიც მოეხდინა გავლენა საარჩევნო პროცესებზე, თუმცა შედეგებმა კრემლს იმედები გაუცრუა. ამერიკელი დიპლომატის და სახელმწიფო დეპარტამენტის ყოფილი მაღალჩინოსნის დენიელ ფრიდის თქმით, ეს არ იქნება რუსეთის ბოლო მცდელობა.

„რუსეთმა უკვე რამდენჯერმე სცადა დასავლურ არჩევნებში ჩარევა. მათ შორის აშშ-ის და საფრანგეთის არჩევნებში. მე ვფიქრობ, რუსეთი არ გაჩერდება მანამ, ვიდრე მის ქმედებებს პასუხი და წინააღმდეგობა არ შეხვდება. დღეს, ამერიკა და ევროპა, მართალია ნელი ტემპით, თუმცა ახერხებს მობილიზაციას, რომ ეფექტურად გაუმკლავდეს რუსეთის აგრესიას. ამის ახსნა ქართველისთვის საჭირო არაა, თქვენ დიდი ხანია ამას უპირისპირდებით“, - ამბობს დენიელ ფრიდი, ევროპის და ევრაზიის საკითხებში ამერიკის ყოფილი დიპლომატი.

საფრანგეთში მიღწეული წარმატების შემდეგ, ერთიანი ევროპული პროექტის ქომაგების ყურადღება ახლა გერმანიისკენ არის მიპყრობილი, სადაც სექტემბრში ეროვნული არჩევნები გაიმართება. ბრიტანეთის მიერ ევროკავშირის დაატოვების შემდეგ ევროკავშირის და ევროპის მომავალს ფრანკო-გერმანული ტანდემი განსაზღვრავს.