ხელმომწერი დაწესებულებები ჯანდაცვის მინისტრს 20 ივლისამდე შეხვედრას სთავაზობენ, წინააღმეგ შემთხვევაში, როგორც წერილშია ნათქვამი, ზოგიერთმა დაწესებულებამ, შესაძლოა, ვეღარ მოახერხონ საქმიანობის გაგრძელება.

რატომ არის მნიშვნელოვანი: 2013 წელს სახელმწიფომ საყოველთაო ჯანდაცვის პროგრამა შემოიღო. მისი მიზანი ჯანმრთელობის დაზღვევის არმქონე მოქალაქეებისთვის სამედიცინო მომსახურების ხელმისაწვდომობის უზრუნველყოფა იყო. ამავე წელს კლინიკებმა მომსახურების ფასი სახელმწიფოსთან შეათანხმეს და ახლა მისი შეცვლა ეკრძალებათ.

• კლინიკები სამინისტროსგან ტარიფების გადახედვასა და ინდექსაციაზე გადაწყვეტილებას ელიან.
• აზარაშვილმა კი 11 ივნისს თქვა, რომ სამინისტრო სამედიცინო მომსახურების ტარიფების ინდექსაციას არ აპირებს.
• სახელმწიფო ტარიფებისა და კლინიკების მომსახურების ფასის შეუსაბამობა პრობლემებს ქმნის.

დეტალები: ღია წერილში ნათქვამია, რომ სამედიცინო დაწესებულებებისთვის ერთ-ერთ მნიშვნელოვან საკითხს წარმოადგენს ტარიფებზე შეთანხმება და ინდექსაცია.

• მათი თქმით, ასოციაცია ოქტომბრის თვიდან ცდილობს ითანამშრომლოს, როგორც ჯანდაცვის სამინისტროსთან, ასევე საქართველოს პარლამენტის ჯანმრთელობის დაცვისა და სოციალურ საკითხთა კომიტეტთანაც.
• "თუმცა 9 თვის მანძილზე, ჩვენს მიერ დაყენებულ ვერცერთ საკითხზე ვერ მოხდა საბოლოო გადაწყვეტილების მიღება".

მათი თქმით, მოულოდნელი იყო 11 ივლისს, მთავრობის სხდომაზე აზარაშვილის გაკეთებული განცხადება ტარიფების ინდექსაციის არ განხორციელებისა და დიაგნოზს შეჭიდული ჯგუფების სისტემის დანერგვის ვადებთან დაკავშირებით.

• "ჯანდაცვის მინისტრის მოადგილეებთან გამართული შეხვედრებისას, ჩვენ ვიღებდით ინფორმაციას, რომ სამინისტრო, არაუგვიანეს ივნისის თვის, რეანიმაციის სტანდარტების დანერგვას, ხოლო აგვისტოს თვიდან დიაგნოზთან შეჭიდული ჯგუფების (DRG) სისტემის დანერგვას გეგმავდა, რაც კლინიკებს "ამოსუნთქვის საშუალებას მისცემდა".
• "მივესალმებით დიაგნოზთან შეჭიდული ჯგუფებით (DRG) საავადმყოფოების დაფინანსების მეთოდზე გადასვლას, თუ აღნიშნული სწორი მეთოდოლოგიით და შესაბამისი კვალიფიკაციის მქონე რესურსით განხორციელდება".
• "საერთაშორისო გამოცდილება გვიჩვენებს, რომ განვითარებულ ქვეყნებში აღნიშნული სისტემის დანერგვას წლები დასჭირდა. შესაბამისად, მიგვაჩნია, რომ DRG სისტემის დანერგვის პარალელურად, უმოკლეს ვადაში უნდა მოხდეს გადაწყვეტილების მიღება საყოველთაო ჯანდაცვის ფარგლებში დაფინანსების შუალედურ გამოსავალთან დაკავშირებით".

520-ე დადგენილება: 2019 წელს სახელმწიფომ ნორმატიული აქტის სახით 520-ე დადგენილება მიიღო, რითაც სახელმწიფო დანახარჯი დააფიქსირა. ჯანდაცვის სფეროს წარმომადგენელთა თქმით, დოკუმენტით ტარიფები არათუ გაიზარდა, არამედ კიდევ უფრო შემცირდა და სამედიცინო დაწესებულებების მდგომარეობა გაუარესდა.

• ღია წერილში ნათქვამია, რომ დღეს II-III დონის რეანიმაციული საწოლი 440-240 ლარით ფინანსდება, როდესაც კლინიკებისათვის ასეთი საწოლის თვითღირებულება დაახლოებით 730 ლარია.

ხელმომწერი დაწესებულებების სია იხილეთ აქ.