გაფრთხილება: სტატია Stranger Things-ის მეოთხე სეზონის შესახებ სპოილერებს შეიცავს

Stranger Things-ის მეოთხე სეზონმა ფანების იმედები ნამდვილად გაამართლა — ახალი საინტერესო პერსონაჟები, საშიში ბოროტმოქმედი, მოულოდნელობებით სავსე სიუჟეტი და ემოციური მომენტები ნამდვილად არ მოგვკლებია. ამაში კი წვლილი სერიალის შემქმნელების, ძმები დაფერების გარდა, თავად მსახიობებმაც შეიტანეს. როგორც აღმოჩნდა, რამდენიმე ემოციური მომენტი სწორედაც მსახიობების იმპროვიზაციის შედეგი ყოფილა.

მაშ ასე, წარმოგიდგენთ Stranger Things-ის მეოთხე სეზონის 3 ემოციურ სცენას, რომელიც მსახიობების იმპროვიზაციის შედეგია:

1. ჰოპერისა და ჯოისის კოცნა

ფოტო: Netflix

მეოთხე სეზონში, როგორც იქნა, ჰოპერისა და ჯოისის პირველი კოცნა ვიხილეთ. მას შემდეგ, რაც ჯოისი და მიური ჰოპერს საბჭოთა ციხიდან დაიხსნიან, ჯოისი და ჰოპერი ერთმანეთს კოცნით ხვდებიან. მოგვიანებით, ციხეში დაბრუნებისას ჰოპერი დემოგორგონის გატყუებას გადაწყვეტს. დამშვიდობებისას კი ისინი ერთმანეთს კვლავ კოცნიან.

როგორც აღმოჩნდა, მეორე კოცნა სცენარში არ ყოფილა და მისი დამატება ვაინონა რაიდერმა და დევიდ ჰარბორმა გადაწყვიტეს. ეს გასაკვირი სულაც არაა — ისინი სერიალში ჯოისისა და ჰოპერის განსაკუთრებულ ურთიერთობაზე წლებია, საუბრობენ. ამ იმპროვიზაციით ჩვენი გულები კიდევ ერთხელ მოიგეს, რადგან ჯოისისა და ჰოპერის ერთად ნახვა ყველას ძალიან გვიხარია.

2. "მიყვარხარ" — ედი დასტინს

ფოტო: Netflix

მას შემდეგ, რაც ჩვენი საყვარელი გმირები ვეკნას დასამარცხებლად გეგმას შეიმუშავებენ, დასტინსა და ედის ღამურების გატყუება დაევალებათ. სტივის, ნენსისა და რობინისთვის მეტი დროის მისაცემად ედი სახლში დასაბრუნებელ გზას მოიჭრის და ღამურებს უფრო შორს გაიტყუებს, შედეგად კი სასიკვდილოდ დაშავდება. რა თქმა უნდა, ედის სიკვდილის სცენა ძალიან სევდიანია და ამ სევდას ედის მიერ დასტინისთვის ნათქვამი "მიყვარხარ" ნამდვილად ვერ ამსუბუქებს. როგორც აღმოჩნდა, ეს ფრაზა სცენარში არ ყოფილა და ჯოზეფ ქვინის იმპროვიზაციის შედეგია.

3. "ერიკა, მიშველე"

ფოტო: Netflix

ვეკნას დასამარცხებლად მაქსმა, ლუკასმა და ერიკამ ბოროტმოქმედი გამოიწვიეს. მანამ, სანამ მეგობრები მაქსის შველას შეძლებენ, ვეკნა მას მაინც მიაგნებს. მართალია, ბოროტმოქმედი დროებით მარცხდება, თუმცა თვალებდასისხლიანებული და კიდურებმოტეხილი მაქსი ლუკასის კალთაში ვარდება.

დაბრმავებული მაქსი ლუკასს ტირილით ეუბნება, რომ ვეღარაფერს ხედავს, ვეღარაფერს გრძნობს, შეშინებულია და სიკვდილი არ უნდა. ლუკასი მის დამშვიდებას უშედეგოდ ცდილობს. როცა ხვდება, რომ სიკვდილის პირას მყოფ მაქსს ვეღარ შველის, დას სასოწაკვეთილი ხმით ეძახის: "ერიკა, მიშველე". ამ უზომოდ სევდიანი სცენის კიდევ უფრო დასამძიმებლად აღნიშნული ფრაზა ქეილებ მაკლაფლინის იმპროვიზაციის შედეგი ყოფილა.

ამავე თემაზე: