სახალხო დამცველი აღნიშნავს, რომ ეს ინციდენტები დანაშაულის ნიშნებს შეიცავს და შესაძლოა, შეკრებისა და გამოხატვის თავისუფლებით სარგებლობაზე მსუსხავი ეფექტი ჰქონდეს, ასევე, აგრესიისა და ძალადობის წაქეზებას ემსახურებოდეს.

რატომ არის მნიშვნელოვანი: დღეს სტუდენტებს, რომლებიც აქციის ფლაერებს არიგებდნენ, ფიზიკურად დაუპირისპირდნენ.

  • სტუდენტები ამბობენ, რომ თავდამსხმელები ქართული ოცნების მხარდამჭერები არიან.

დეტალები: სახალხო დამცველი ხაზგასმით აღნიშნავს, რომ წინასწარ გაცხადებული მშვიდობიანი აქციის ორგანიზება და ამ მიზნით, საინფორმაციო ბარათების გავრცელება სრულად დაცულია შეკრებისა და გამოხატვის თავისუფლებით.

  • მისი თქმით, ამის სრულფასოვანი რეალიზების უზრუნველყოფა ხელისუფლების ვალდებულებას წარმოადგენს;
  • სახალხო დამცველი მოუწოდებს სამართალდამცავ ორგანოებს, ხელი შეუწყონ კამპანიების მშვიდ და უსაფრთხო ვითარებაში წარმართვას;
  • ასევე, დროულად აღკვეთონ მის წინააღმდეგ გამოვლენილი სამართალდარღვევები, დანაშაულებრივი ქმედებები, მათი მცდელობები და დანაშაულის შემცველ ფაქტებზე დაიწყოს გამოძიება.

ამავდროულად, ომბუდსმენი მიუთითებს, რომ მნიშვნელოვანია, თბილისის სახელმწიფო უნივერსიტეტის ადმინისტრაციამ ეფექტიანად უზრუნველყოს სტუდენტთა უსაფრთხოება.

  • გააკონტროლოს დაწესებულების ტერიტორიაზე მესამე პირთა დაშვება და ინციდენტებზე მყისიერი რეაგირება მოახდინოს.

შსს-მ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

თავდასხმები დაგმეს არასამთავრობო ორგანიზაციებმაც. ისინი სამართალდამცავ ორგანოებს ინციდენტების აღსაკვეთად პრევენციული ღონისძიებების გატარებისკენ მოუწოდებენ.

  • IDFI-ის თქმით, აქციის წარმომადგენლებზე თავდასხმა დანაშაულის ნიშნებს შეიცავს და კოორდინირებულ ხასიათს;
  • საია მმართველ პარტიას მოუწოდებს, მისი მხარდამჭერების მობილიზება შეწყვიტოს.

არქივიდან: 24 ივნისს აქციაზე #შინევროპისკენ პრემიერმინისტრის, ირაკლი ღარიბაშვილის გადადგომა მოითხოვეს.

  • მონაწილეების მიერ მთავრობისთვის დაწესებული ერთკვირიანი ვადა კვირას, 3 ივლისს გადის;
  • პირობების შეუსრულებლობის შემთხვევაში, მოქალაქეები პარლამენტის წინ შეიკრიბებიან და მათ შესრულებამდე არ დაიშლებიან.