აშშ-ში აბორტის კონსტიტუციური უფლების გაუქმებამ საზოგადოებაში დიდი პროტესტი გამოიწვია. ცნობილი მსახიობი და აქტივისტი ჯეინ ფონდა ერთ-ერთია იმ უამრავ ადამიანს შორის, ვინც უზენაესი სასამართლოს მიერ აბორტის უფლების გაუქმება გააპროტესტა.

"თუ შეიძლება, რომ კორპორაცია პიროვნებად განისაზღვროს, რატომ არ განვსაზღვრავთ ვაგინას AK47-ად? ამ გზით ვაგინა იმათი დაწესებული სამთავრობო შეზღუდვებისგან გათავისუფლდება, ვინც "სიცოცხლის ხელშეუხებლობაზე" ზრუნავს", — წერს ჯეინ ფონდა ტვიტერზე.

AK47 ცეცხლსასროლი იარაღია, რომელსაც ბევრი ასევე იცნობს კალაშნიკოვის სახელით.

ჯეინ ფონმამ აქცენტი იმ ფაქტზე გააკეთა, რომ აშშ-ში აბორტი კანონიერად შეიძლება აიკრძალოს, მაგრამ აშშ-ის კონსტიტუციის მე-2 შესწორებით მოქალაქეებს იარაღის ფლობის უფლება აქვთ. შეგახსენებთ, რომ მაისში აშშ-ის ქალაქ ბუფალოს სუპერმარკეტში სროლას სულ მცირე 10 ადამიანი ემსხვერპლა. ამის შემდეგ ტეხასის დაწყებით სკოლაში სროლის შედეგად 21 ადამიანი დაიღუპა, მათ შორის კი 19 ბავშვი იყო. ორივე შემთხვევაში მსროლელმა AR-15-ის ტიპის იარაღი გამოიყენა.

"ხალხი, რომელიც მხარს უჭერს იმ იდეას, რომ ქალს საკუთარი სხეული კონტროლის უფლება არ უნდა ჰქონდეს, იგივე ადამიანებია, რომლებსაც ვაქცინაცია არ სურთ", — დასძინა ჯეინ ფონდამ.

ჯეინ ფონდას გარდა აბორტის კონსტიტუციური უფლების გაუქმება ბილი ჯო არმსტრონგმა, ოლივია როდგირომ, მეგან თი სტალიონიმ, პინკმა და სხვა ცნობილმა ადამიანებმაც გააპროტესტეს. "თუ გჯერა, რომ ქალის საშვილოსნო, ლგბტქ+ ადამიანების ცხოვრება და ქორწინება სახელმწიფოს საქმეა ან რასიზმი მიღებულია, გთხოვ, ღვთის გულისთვის, აღარ გაბედო ჩემი მუსიკის მოსმენა. და საერთოდ, დაახვიე. შევთანხმდით?" — წერს პინკი თავის ტვიტერზე

შეგახსენებთ, რომ რამდენიმე დღის წინ აშშ-ის უზენაესმა სასამართლომ 1973 წლის გადაწყვეტილება გააუქმა, რომელიც ქალებს საკუთარი სურვილით აბორტის გაკეთების კონსტიტუციურ უფლებას აძლევდა. ეს იმას ნიშნავს, რომ ცალკეულ შტატს თავად ექნება უფლება გადაწყვიტოს, დაშვებული იქნება თუ არა აბორტი.

ასევე იხილეთ: