რამდენიმე დღის წინ აშშ-ის უზენაესმა სასამართლომ 1973 წლის გადაწყვეტილება გააუქმა, რომელიც ქალებს საკუთარი სურვილით აბორტის გაკეთების კონსტიტუციურ უფლებას აძლევდა. ეს იმას ნიშნავს, რომ ცალკეულ შტატს თავად ექნება უფლება გადაწყვიტოს, დაშვებული იქნება თუ არა აბორტი. ეს ფაქტი ბევრმა ადამიანმა გააპროტესტა, მათ შორის კი ერთ-ერთი მომღერალი ოლივია როდრიგო იყო.

Glastonbury-ის მუსიკალური ფესტივალზე სიმღერის შესრულებამდე ოლივია როდრიგო სიტყვით გამოვიდა."ამ გადაწყვეტილებით განადგურებული და შეშინებული ვარ. ამის გამო უამრავი გოგო დაიღუპება", — განაცხადა მომღერალმა აშშ-ში აბორტის კონსტიტუციური უფლების გაუქმების შესახებ.

"მინდა, შემდეგი სიმღერა უზენაესი სასამართლოს იმ ხუთ მოსამართლეს მივუძღვნა, რომლებმაც დაგვანახეს, რომ თავისუფლება საერთოდ არ აღელვებთ. ჩვენ გვეზიზღებით", — განაცხადა როდრიგომ სიმღერის შესრულების წინ, რომელიც ლილი ალენის Fuck You აღმოჩნდა. მოგვიანებით ოლივია როდრიგოს სიმღერის ავტორი ლილი ალენიც შეუერთდა.


Glastonbury-ის მუსიკალური ფესტივალზე აბორტის კონსტიტუციური უფლების შესახებ ბილი აილიშმაც გააკეთა კომენტარი. სანამ სიმღერა Your Power-ს შეასრულებდა, მომღერალმა უზენაესი სასამართლოს გადაწყვეტილება გააპროტესტა. "სიმღერა, რომელსაც ახლა შევასრულებ, ძალაუფლების კონცეფციას ეხება და იმასაც, რომ ეს უპირატესობა ბოროტად არ უნდა გამოვიყენოთ. დღეს აშშ-ში ქალებისთვის ყველაზე საშინელი დღეა და ამ მომენტში ამის გარდა ვერაფერზე ვფიქრობ", — განაცხადა ბილი აილიშმა.