24 ივნისს აშშ-ის უზენაესმა სასამართლომ აბორტის კონსტიტუციური უფლება გააუქმა და თითოეულ შტატს თავად მიეცა შესაძლებლობა, რომ გადაწყვიტოს, დაშვებული იქნება თუ არა აბორტი.

ამის გამო როგორც აშშ-ში, ისე მთელ მსოფლიოში ადამიანის უფლებათა დამცველები შიშობენ, რომ მილიონობით ქალს შეეზღუდება აბორტის უფლება, რადგან უფრო კონსერვატიულმა შტატებმა უკვე გამოთქვეს სურვილი გარკვეული შეზღუდვების დაწესების.

შექმნილ ვითარებიდან გამომდინარე აბორტის მომხრეები პროტესტისა და გამოსავლის სხვადასხვა გზას ეძებენ. მათ შორის არიან დიდი კომპანიები, რომლებმაც ღიად განაცხადეს, რომ თავიანთ თანამშრომლებს მგზავრობის და სხვა აუცილებელ ხარჯებს აუნაზღაურებენ, თუ მათ აბორტის ლეგალურად გაკეთების შესაძლებლობა თავიანთ შტატში არ ექნებათ და სხვა შტატში გადასვლა დასჭირდებათ.

The New York Times-ის ცნობით, ჯერ კიდევ მაისში, როცა მედიაში გავრცელდა ინფორმაცია, რომ აშშ-ის უზენაესი სასამართლო აბორტის კონსტიტუციური უფლების გაუქმებას აპირებდა, ისეთმა დიდმა კომპანიებმა, როგორებიცაა Starbucks, Tesla, Airbnb, Microsoft, Netflix, Amazon და Reddit, განაცხადეს, რომ თავიანთ თანამშრომლებს აბორტის ხარჯებს აუნაზღაურებდნენ.

24 ივნისს საკონსტიტუციო სასამართლოს მიერ სისრულეში მოყვანილი გადაწყვეტილების შემდეგ ამ კომპანიებს ასევე შეუერთდა Balenciaga, Disney, Bank of America, Warner Bros. Meta, BuzzFeed, H&M, Adobe, Google, Nike და სხვები.

The Guardian-ის ინფორმაციით, ჯერ-ჯერობით ისეთ დიდ კომპანიებს, როგორებიცაა McDonald’s, PepsiCo და Coca-Cola, ამასთან დაკავშირებით პოზიცია არ გამოუხატავთ და ჩუმად არიან.

აბორტის მომხრეების საპროტესტო აქცია სასამართლოს შენობის წინ, ლოს-ანჯელესი.

ფოტო: Apu Gomes/AFP/Getty Images

როგორც BBC წერს, აშშ-ში აბორტი ავტომატურად აკრძალული არ გახდება, მაგრამ დიდი ალბათობით, ცალკეული შტატები ეტაპობრივად მივლენ სრულ აკრძალვამდეც.

უკვე 13-მა შტატმა ამის "გამაფრთხილებელი კანონი" მიიღო კიდეც.

20-ზე მეტი შტატი აპირებს, რომ აბორტის ხელმისაწვდომობა გარკვეულწილად შეზღუდოს.

აბორტის საკითხი აშშ-ში დიდი დავის საკითხია დღემდე. ბოლო კვლევებმა აჩვენა, რომ ზრდასრული მოსახლეობის 61%-ის აზრით, აბორტი ლეგალური უნდა იყოს, 37% კი ფიქრობს, რომ უნდა აიკრძალოს.

ასევე იხილეთ: