შობა და ახალი წელი მერაია ქერის ჰიტად ქცეული სიმღერის, All I Want for Christmas is You, გარეშე ალბათ ვერ წარმოგვიდგენია. 1994 წელს გამოსული ჩანაწერი სადღესასწაულო კლასიკადაც იქცა, თუმცა, თითქმის სამი ათწლეულის შემდეგ, მისისიპელი მუსიკოსი პოპვარსკვლავს უჩივის და აცხადებს, რომ სიმღერა იდენტური სათაურით მან ქერის ჰიტამდე ხუთი წლით ადრე გამოუშვა.

კომპოზიტორი ენდი სტოუნი, რომელსაც თავისი ბენდი — Vince Vance & The Valiants — ჰყავს, ირწმუნება, რომ არც ქერის და არც სიმღერის გამომშვებ სტუდია Sony Music Entertainment-ს მისგან სათაურის გამოყენებაზე ნებართვა არ აუღიათ. სტოუნი ასევე ამტკიცებს, რომ მომღერალმა და ლეიბლმა "გაცნობიერებულად და მიზანმიმართულად" მიითვისეს მისი ნამუშევარი.

სტოუნმა სარჩელი ლუიზიანის ფედერალურ სასამართლოში უკვე შეიტანა. თუმცა, სარჩელის ტექსტში დაკონკრეტებული არ არის, როდის შეიტყო მისმა ავტორმა ქერის სიმღერის არსებობის შესახებ, მაშინ, როცა ეს ჰიტი ყოველწლიურად ჩარტების მოწინავე პოზიციებზეა.

უცნობია, რა შედეგი მოჰყვება სტოუნის წამოწყებულ სასამართლო დავას. სიმღერის სათაურებს, როგორც წესი, საავტორო უფლებები არ ეხება, ერთი და იმავე სახელის მქონე კომპოზიცია კი ხშირად ეკუთვნის სხვადასხვა მუსიკოსს. თუნდაც All I Want for Christmas is You ქერის და სტოუნის სიმღერების გარდა არაერთ სხვა ნაწარმოებს ჰქვია.

მისისიპელი კომპოზიტორის სარჩელში კი ქერის სიმღერასთან სხვა მსგავსებაზე არაფერი წერია. ტექსტებშიც მხოლოდ სათაურში გამოტანილი ფრაზები ემთხვევა ერთმანეთს.

All I Want for Christmas is You მერაია ქერის ერთ-ერთი ყველაზე წარმატებული სიმღერაა, რომელმაც მუსიკოსს $60 მილიონზე მეტი შემოსავალი მოუტანა. კომპოზიცია პირველი საშობაო ტრეკი გახდა, რომელსაც ამერიკის ხმის ჩამწერი კომპანიების ასოციაციამ (RIAA) ბრილიანტის სტატუსი მიანიჭა.