საქართველოს პრეზიდენტი, გიორგი მარგველაშვილი ემანუელ მაკრონს საფრანგეთის პრეზიდენტად არჩევას ულოცავს:

"მსურს გულითადად მოგილოცოთ საფრანგეთის რესპუბლიკის საპრეზიდენტო არჩევნებში გამარჯვება და გისურვოთ წარმატებები თქვენს სახელმწიფოებრივ საქმიანობაში".

გიორგი მარგველაშვილის განცხადებით, დღევანდელი არჩევანით ფრანგმა ხალხმა დაადასტურა სწრაფვა კეთილდღეობისა და შემდგომი განვითარებისათვის:

"ეს არის არჩევანი ძლიერი საფრანგეთისა და ძლიერი ევროპის მხარდასაჭერად, რაც ესოდენ მნიშვნელოვანია ჩვენი საერთო ევროპული ოჯახის მომავლისათვის. თანამედროვე, სირთულეებითა და გამოწვევებით სავსე მსოფლიოში სწორედ საფრანგეთი წარმოადგენს დემოკრატიის ერთ-ერთ სიმბოლოსა და საყრდენს. მჯერა, რომ თქვენი პრეზიდენტობა კიდევ უფრო წარმოაჩენს და გააძლიერებს ამ უმნიშვნელოვანეს და საპატიო მისიას.

ჩვენს ხალხებს შორის ისტორიულ-კულტურული კავშირები საუკუნეებს ითვლის, რამაც უზრუნველყო ჩვენი ქვეყნების თანამშრომლობა და განაპირობა ჩვენი სამხედრო კონტიგენტების ურთიერთთანადგომა ცენტრალური აფრიკის რესპუბლიკაში. ჩვენ ვაძლიერებთ ერთმანეთს და შესაბამისად, ვაძლიერებთ ჩვენს საერთაშორისო მშვიდობასა და უსაფრთხოებას. საფრანგეთი საქართველოსთვის სტრატეგიული პარტნიორი და ჩვენი ევროპული და ევროატლანტიკური მისწრაფებების მტკიცე მხარდამჭერია. წელს ჩვენ დიპლომატიური ურთიერთობების დამყარების 25 წლის იუბილეს ვზეიმობთ და დარწმუნებული ვარ, რომ თქვენი პრეზიდენტობა ამ თანამშრომლობას კიდევ უფრო გააძლიერებს".

საქართველოს პრემიერმა გიორგი კვირიკაშვილმა მაკრონს ტვიტერით მიულოცა არჩევნების შედეგები და დაწერა, რომ იგი მოუთმენლად ელის ორ ქვეყანას შორის თანამშრომლობას და ურთიერთობების გაღრმავებას.

ემანუელ მაკრონს გამარჯვება მიულოცა პრეზიდენტობის მეორე კანდიდატმა, მარინ ლე პენმა. წინასწარი შედეგების გამოცხადების შემდეგ გამართულ ბრიფინგზე მან ჟურნალისტებს უთხრა, რომ ქვეყანამ ცენტრისტი მაკრონის სახით, შეუცვლელი რეჟიმი აირჩია.

ასევე, მაკრონს გამარჯვება მიულოცა ევროკომისიის თავმჯდომარემ ჯან კლოდ იუნკერმა: "ბედნიერებაა, რომ ფრანგმა ხალხმა ევროპული მომავალი აირჩია".

ევროსაბჭოს გენერალური მდივანი ტორბიორდ იაგლანდი ტვიტერზე წერს: "ესა არის შვება, როდესაც იგებ, რომ საფრანგეთი ევროპული ღირებულებებისა და ადამიანის უფლებების პატივისცემას გააგრძელებს".

საპრეზიდენტო არჩევნების ეგზიტპოლის შედეგებით, რომელიც ფრანგულმა ტელეარხმა France 2-მა ჩაატარა, მეორე ტურში, ემანუელ მაკრონმა ხმების 65,1 პროცენტი მიიღო, მარინ ლე პენმა კი - 34,9 პროცენტი.

ეგზიტპოლი: საფრანგეთის ახალი პრეზიდენტი ემანუელ მაკრონი გახდა