კანში ყოველწლიური დაჯილდოების ცერემონია Palm Dog Award ჩატარდა, რომელზეც სხვადასხვა კატეგორიაში საზოგადოებისთვის ცნობილ ძაღლებს აჯილდოებენ. წელს ერთ-ერთი პრიზის მფლობელი ცნობილი უკრაინელი ძაღლი, სახელად პატრონი, გახდა.

2 წლის პატრონი სოციალური ქსელებში ძალიან პოპულარულია. პატრონმა უკრაინის ომში უკვე დიდი როლი ითამაშა და 200-ზე მეტი რუსული ბომბი იპოვა. პატრონი უკრაინის სახელმწიფო საგანგებო სამსახურის წევრია და ამჟამად ქალაქ ჩერნიგოვში ცხოვრობს.

ფოტო: Getty Images

პატრონმა კანის ფესტივალზე ჯილდო, სახელად PalmDogManitarian, მიიღო. ეს ჯილდო ძაღლებს ადამიანებთან განსაკუთრებული კავშირის გამოვლენისთვის გადაეცემათ, რაშიც პატრონი წელს ნამდვილად უკონკურენტო იყო.

ეს პატრონისთვის პირველი ჯილდო არ არის, რადგან ვოლოდიმირ ზელენსკიმ 2 წლის ძაღლსა და მის მეპატრონეს რუსეთის შემოჭრის წინააღმდეგ თავდადებული ბრძოლისთვის მედალი გადასცა. პატრონი, რომელმაც ომის დაწყებიდან დღემდე დიდი რაოდენობით ბომბი და ასაფეთქებელი ნივთიერება აღმოაჩინა, უკრაინული პატრიოტიზმის სიმბოლოდ იქცა.

ფოტო: Reuters

სამწუხაროდ, გამნაღმველმა ძაღლმა კანის ფესტივალზე დასწრება ვერ შეძლო და როგორც მისმა მეპატრონემ აღნიშნა, "ძაღლს ახლა ძალიან ბევრი საქმე აქვს". ცერემონიაზე პატრონის ნაცვლად ჯილდო სხვა გამნაღმველ ძაღლს გადასცეს, რომელიც უკრაინის დაცვაში ასევე აქტიურადაა ჩართული.

ასევე იხილეთ: