ლეგენდარული ინგლისური მუსიკალური ბენდის Depeche Mode-ის წევრი ენდრიუ ფლეტჩერი გარდაიცვალა.

მუსიკოსი 60 წლის იყო.

ამის შესახებ ოფიციალური ინფორმაცია ბენდის სოციალურ მედიაზე გამოქვეყნდა:

"გაოგნებულები და უზომო მწუხარებით აღვსილნი ვართ ჩვენი ძვირფასი მეგობრის, ოჯახისა და ბენდის წევრის, ენდი 'ფლეტჩ' ფლეტჩერის უდროოდ გარდაცვალების გამო."

ბენდის განცხადებაში ასევე ვკითხულობთ, რომ "ფლეტჩს ოქროს გული ჰქონდა, ყოველთვის მზად იყო დახმარებისთვის, საინტერესო საუბრისთვის, გემრიელი სიცილისა და ცივი ლუდისთვის. ჩვენი გული ახლა მის ოჯახთანაა და გთხოვთ, თქვენც მათზე იფიქროთ და ამ რთულ დროს მათ პირად სივრცეს პატივი სცეთ".

ენდრიუ ფლეტჩერი ერთ-ერთი იყო, ვინც Depeche Mode დააფუძნა: ამ სახელწოდებით ბენდმა პირველი ალბომი 1981 წელს გამოუშვა და მას შემდეგ დიდი ბრიტანეთის ჩარტები მრავალჯერ დაიპყრო, მუსიკალურ სამყაროში კი ელექტრონული მუსიკის გამორჩეული შემოქმედების სახელი დაიმკვიდრა.

ფლეტჩერი მარჯვენა კუთხეში.

ფოტო: Getty Images

The Guardian-ის ინფორმაციით, ენდრიუ ფელტჩერი არ იყო ბენდის მომღერალი ან სიმღერების ტექსტების მთავარი ავტორი: ბოლო წლებში მას უფრო Depeche Mode-ის მენეჯერის როლში წარმოიდგენდნენ ხოლმე.

ბენდში ის სინთეზატორზე უკრავდა.