აშშ-ს კონგრესის ქვედა პალატამ რესპუბლიკელების ჯანდაცვის კანონპროექტთა პაკეტს, მცირე უპირატესობით, მხარი დაუჭირა. პრეზიდენტმა დონალდ ტრამპმა კი ობამაქეარი მკვდრად გამოაცხადა.

217 კონგრესმენი 213-ის წინააღმდეგ - BBC-ის ცნობით, ამ შედეგით პაკეტმა პირველი სამართლებრივი გამარჯვება მოიპოვა.

დემოკრატები ამბობენ, რომ ამერიკის მოქმედი ჯანდაცვის პაკეტის გაუქმებით მილიონობით ადამიანი დაზღვევის გარეშე დარჩება.

კანონპროექტი სენატში გადაიგზავნება, თუმცა რესპუბლიკელების თქმით, აღნიშნულ დოკუმენტს გვერდით გადადებენ და ახალ კანონს დაწერენ.

ჯერ კიდევ ექვსი კვირის წინ, ჯანდაცვის ახალ პაკეტს საკმარისი მხარდაჭერა არ ჰქონდა და მასში რამდენიმე ცვლილებაც შევიდა, რათა რესპუბლიკური პარტიის ყველა ფრთისათვის მოსაწონი ყოფილიყო.

კანონპროექტის მიღების შემთხვევაში, აშშ-ის ჯანდაცვის სისტემაში სერიოზული გადაწყობა მოხდება, თუმცა, შესაძლოა, რესპუბლიკელმა სენატორებმა მნიშვნელოვანი დეტალები შეცვალონ.

პარტიას სენატში 52 სენატორი ჰყავს 48 დემოკრატი სენატორის წინააღმდეგ. თუ სენატორებმა ახალი კანონი დაწერეს, პროექტი ისევ წარმომადგენელთა პალატაში დაბრუნდება განსახილველად.