ფეისბუქმომხმარებელი, დათო ტრაპაიძე აცხადებს, რომ ბათუმში, თარჯიმანთა ბიუროში რუსეთის ოთხმა მოქალაქემ კარებზე გაკრული უკრაინის დროშა გააპროტესტა, რომელსაც ზმეინის კუნძულის დამცველების ცნობილი ფრაზა ეწერა. ტრაპაიძე წერს, რომ რუსებმა ფიზიკური შეურაცხყოფა მიაყენეს თარჯიმანს.

როგორც ტრაპაიძე ამბობს, თარჯიმანთა ბიუროს თანამშრომლებმა პოლიცია გამოიძახეს და რუსებმა განყოფილებაში ჩვენებაც მისცეს.

"ჩვენებები მიცემულია, ახლა პოლიციას დაველოდებით. სამუშაო პროცესში ხელის შეშლა, სხვისი ნივთის ხელყოფა, ფიზიკური შეურაცხყოფა. თან ემუქრებოდნენ სათარჯიმნო საქმიანობაში სამომავლოდ ხელის შეგიშლითო, ვიტყვით რომ ცუდები ხართო, კლიენტებს დაგიფრთხობთო", — წერს ის.

თარჯიმანთა ბიუროს თანამშრომელი, ელენე ხაჯაშვილი ბათუმელებთან ამბობს, რომ როდესაც უკრაინის დროშის დაზიანება დაიწყეს, მისმა კოლეგამ, ნანა წაქაძემ რუსეთის მოქალაქეებს მიუთითა, რომ კერძო საკუთრებაში იყვნენ და სხვის ქონებას აზიანებდნენ. ხაჯაშვილი ჰყვება, რომ ისინი მათ ემუქრებოდნენ კიდეც.

"ჯერ დაგვემუქრნენ, უნდა გიჩივლოთ, დაგვიწერეთ თქვენი სახელი და გვარი რომ გიჩივლოთო. ჩხუბი უნდოდათ, მაგრამ ჩვენ არ ავყევით. მე სახელი და გვარიც დავუწერე, წადით და მიჩივლეთ-მეთქი. ეს არ მოეწონათ და დაიწყეს დროშის ჩამოხევა", — ამბობს ის ბათუმელებთან.

ნანა წაქაძე ბათუმელებთან აცხადებს, რომ ფიზიკური შეურაცხყოფა მაშინ მიაყენეს, როდესაც ტელეფონით გადაღება დაიწყო.

"ამ დროს ახლოდან ტელეფონით ვიღებდი, როცა ფიზიკურად შემეხო, ხელი დამარტყა. გამოვიძახეთ პოლიცია და მალევე მოვიდნენ, გადამიყვანეს განყოფილებაში, სადაც მივეცი ჩვენება", — თქვა მან ბათუმელებთან.

On.ge დამატებითი ინფორმაციისთვის შინაგან საქმეთა სამინისტროს დაუკავშირდა და მათ პასუხს მიღებისთანავე შემოგთავაზებთ.