ბრიტანელი მომღერლისა და დიზაინერის, ვიქტორია ბექჰემის თქმით, დრომოჭმულია იმის სურვილი, რომ ძალიან გამხდარი იყო. ჟურნალ Grazia-სთვის მიცემულ ინტერვიუში ბექჰემმა აღნიშნა, რომ მომხმარებლები დღეს უფრო მეტად ეძებენ თავიანთ ბუნებრივ სხეულზე მორგებულ სამოსს. ამასთან, ისინი ნაკლებად არიან დაინტერესებულები, რომ რაც შეიძლება, "პატარა" გამოჩნდნენ.

"დრომოჭმული დამოკიდებულებაა იმის ნდომა, რომ ძალიან გამხდარი იყო", — ამბობს ვიქტორია, — "ვფიქრობ, ქალებს დღეს სურთ, რომ ჯანსაღად გამოიყურებოდნენ და მომრგვალებული ფორმები ჰქონდეთ. მათ უნდათ, მკერდი და საჯდომი ჰქონდეთ".

ინტერვიუერის შენიშვნაზე, რომ ბექჰემი თავად ყოველთვის ძალიან გამხდარია, დიზაინერი ამბობს, საქმე "კონკრეტულ ზომას" არ ეხება.

"საქმე ეხება იმის ცოდნას, თუ ვინ ხარ და ასევე იმას, რომ საკუთარი თავით ბედნიერი იყო", — აღნიშნავს ბექჰემი, — "მე ჯანსაღად კვებით და ვარჯიშით დისციპლინასა და გართობას შორის ბალანსი დავიჭირე. როცა ახალგაზრდა ხარ, ამ ბალანსის დამყარება გიჭირს, მაგრამ ასაკის მატებასთან ერთად, იმასაც მივხვდი, რას ნიშნავს წონასწორობა. მე, უბრალოდ, ვიცი, რა ამართლებს ჩემთვის".

ფოტო: Matt Winkelmeyer / Getty Images

ბექჰემი აქტიურად ვარჯიშობს. მისი თქმით, საჯდომის ფორმაზე სამუშაოდ ყოველ დილით აკეთებს ჩაჯდომებს. დიზაინერი აღნიშნავს, რომ გარეგნობის ცვლილების სურვილი გასულ წელს გაუჩნდა, როცა პოსტპანდემიურ პერიოდში ოჯახთან ერთად მაიამიში ცხოვრობდა.

"ცვლილება მინდოდა. მინდოდა, ისევ სექსუალურად მეგრძნო თავი", — იხსენებს ვიქტორია, — "მაიამიში ბევრი ქალია, ვისაც მომრგვალებული ფორმები აქვს და ამას შესანიშნავად იხდენენ. სანაპიროზე მიაბიჯებენ, არცთუ ბევრი რამ აცვიათ და ფანტასტიკურად გამოიყურებიან. საკუთარ სხეულებს თავდაჯერებულები აჩენენ. მათი დამოკიდებულებაც და სტილიც თავისუფლებად მიმაჩნია. და, როგორც დედას, მიხარია, რომ [ჩემი შვილი] ჰარპერი ისეთი ქალების გარემოცვაშია, ვისაც თავისი გარეგნობა და მომრგვალებული ფორმები მოსწონს".

თავისუფალი სტილისადმი თავისი დამოკიდებულების გამოხატვა ბექჰემმა საქმეშიც სცადა. დიზაინერის ერთ-ერთი ბოლო კოლექცია მომხმარებლისთვის, ერთი მხრივ, მოხერხებული და კომფორტულია, მეორე მხრივ კი, მას საშუალებას აძლევს, სხეულის ფორმები თავდაჯერებულმა გამოკვეთოს.