ხანგრძლივი ლოდინის შემდეგ ერთ-ერთი ყველაზე წარმატებული სერიალი Black Mirror ახალი, მე-6 სეზონით ბრუნდება! შავი სარკე კვლავ მზადაა, ჩვენი შეშინება, დაფიქრება თუ დაბნევა საკუთარ თავზე აიღოს.

ჯერჯერობით ახალი სეზონის გამოსვლის თარიღი და შინაარსთან დაკავშირებული დეტალები ცნობილი არაა. მხოლოდ ის ვიცით, რომ ახალ სეზონში მეხუთე სეზონზე მეტი ეპიზოდი იქნება. Black Mirror-ის მეხუთე სეზონი 2019 წლის ივნისში გამოვიდა და მასში ისეთი ცნობილი სახეები ვიხილეთ, როგორებიც არიან მაილი საირუსი, ენტონი მაკი და ენდრიუ სკოტი. მეხუთე სეზონი სულ რაღაც 3 ეპიზოდისგან შედგება.

აღსანიშნავია, რომ სერიალის შემქმნელი, ჩარლი ბრუკერი 2020 წელს აცხადებდა, რომ მეექვე სეზონისთვის მსოფლიო მზად არ იყო, რადგან რეალობა ისედაც საკმარისად პირქუში იყო. როგორც ჩანს, შემქმნელებმა აზრი შეიცვალეს.

Black Mirror ანთოლოგიური სერიალია, რაც იმას ნიშნავს, რომ ყოველი ეპიზოდი განსხვავებული შინაარსისაა და მასში სხვადასხვა მსახიობები თამაშობენ. სერიალში ნაჩვენებია თანამედროვე საზოგადოება, განსაკუთრებით კი, მასზე ტექნოლოგიების ზემოქმედების შედეგი. სერიალის პირველი ეპიზოდი ჯერ კიდევ 2011 წელს ვნახეთ, თუმცა ის პოპულარულობას დღემდე არ კარგავს.