Black Mirror ნეტფლიქსის ერთ-ერთი ყველაზე გახმაურებული სერიალია, რომლის ახალი სეზონის გამოსვლასაც მაყურებლები მოუთმენლად ელიან, თუმცა მაშინ, როცა მსოფლიო ბოლო თვეების განმავლობაში პანდემიასთან გამკლავებას ცდილობს, ნამდვილად გვჭირდება შიშისმომგვრელი სერიალი, რომელიც მომავალს კიდევ უფრო მუქ ფერებში გვიხატავს?

ამ შოუს შემქმნელი ჩარლი ბრუკერი ფიქრობს, რომ არა.

Radio Times-თან მიცემულ ინტერვიუში ამ ცნობილმა სცენარისტმა და პროდიუსერმა განაცხადა, რომ მაყურებლები ამჟამად ახალი სეზონის სანახავად მზად არ არიან:

"საქმეებით დატვირთული ვარ, თუმცა არ ვიცი, რისი თქმა შემიძლია იმის შესახებ, თუ რას ვაკეთებ ან არ ვაკეთებ ახლა. ამ მომენტისთვის არ ვიცი ვის უნდა ჰქონდეს სურვილი, რომ საზოგადოების დაშლისა თუ განადგურების შესახებ ისტორიებს უყუროს. ამიტომაც ამჟამად ახალ სეზონზე არ ვმუშაობ. უფრო დაინტერესებული ვარ, რომ კომიქსის ჟანრში საკუთარი ძალები გამოვცადო და ის სცენარები შევქმნა, რომლებიც მე თვითონაც გამაცინებს".

Black Mirror-ის ჯერჯერობით ბოლო, მეხუთე სეზონი 2019 წლის ივნისში გამოვიდა და მასში ისეთი ცნობილი სახეები ვიხილეთ, როგორებიც არიან მაილი საირუსი, ენტონი მაკი და ენდრიუ სკოტი.

ჩარლი ბრუკერი ამ შოუს დასაწყისიდანვე — 2011 წლიდან ხელმძღვანელობს, როცა ის ჯერ კიდევ Channel 4-ის პროდუქცია იყო. ახალი სეზონი ოფიციალურად დაანონსებული არ არის, თუმცა რეიტინგის შესაბამისად მაყურებლები მის შეჩერებას არც ელოდებიან. თანაც გაგრძელების სურვილი თავად ბრუკერმაც გამოთქვა შარშან მეხუთე სეზონის გამოსვლის შემდეგ:

"ვფიქრობ, რომ ჩვენი შეჩერება არაფერს შეუძლია, რადგან ნებისმიერ ფორმატს შეგვიძლია მოვერგოთ და გადავიღოთ ერთეპიზოდიანი ისტორიები, ერთი სიუჟეტური ხაზის მქონე რამდენიმე სერია ან თუნდაც სპინოფები".